Ersaiyn Hamitov pen Viacheslav Son óz erikterimen Bereke Banktiń direktorlar keńesiniń quramynan shyqty. Bul týraly málimet KASE saitynda jariialandy, dep habarlaidy Dalanews.kz.
Engizilgen ózgeristerden soń "Bereke Bank" AQ-tyń direktorlar keńesi endi tórt adamnan turady: Asqar Elemesov, Maǵjan Mádiev, Maqsat Nuridenuly, Andrei Timchenko.
Buǵan deiin "Báiterek" Ulttyq basqarýshy holdingi men Qatardyń Lesha Bank LLC (Public) "Bereke Bank" AQ-qa tiesili 100% aktsiiany satý boiynsha mámileni aiaqtaǵandaryn jariialaǵan bolatyn.
Bank klientteri aldyndaǵy barlyq mindettemeni oryndaýdy, óz qyzmetin kommertsiialyq ámbebap bank retinde jalǵastyra beretin bolady, sondai-aq usynyp otyrǵan bank ónimderi boiynsha sharttar da saqtalady.
Aita ketsek, 2022 jyldyń qyrkúieginde "Báiterek" memlekettik holdingi keiin Bereke Bank dep ataýy ózgergen Sberbanktiń Qazaqstandaǵy enshiles bankiniń jalǵyz qojaiyny atandy. Bankti holding "Sberbank" JAQ-tan bank qarajaty esebinen satyp aldy, atap aitqanda 2021 jylǵy 130 mlrd teńge mólsherindegi dividendter tólemin jumsaý arqyly. Osy jaǵynan alǵanda, bul maqsatqa memleket qarajaty paidalanylǵan joq.
2024 jyldyń aqpanynda katarlyq Lesha Bank "Báiterek" UBH-men elimizdegi áleýetti bankti satyp alý boiynsha kelisimge otyrǵany belgili boldy. Mamyr aiynda kelisimshart somasy 65 mlrd teńgeni qurady dep habarlandy.
8 qazanda Qarjy naryǵyn retteý jáne damyttý agenttigi Bereke Bank AQ-tyń qojaiyny aýysqanyn resmi túrde jariialap, Qazaqstannyń qarjy naryǵyna sheteldik investordyń kelýi ekinshi deńgeidegi bankter arasynda básekelestikti kúsheitip, naqty sektorǵa kredit berýdiń ósýin qamtamasyz etetinin aitty.
Agenttik málimetinshe, Lesha Bank qyzmetin shariǵat normalaryna sáikes júzege asyratyn bank bolyp tabylady jáne Qatar Financial Center Regulatory Authority-diń bank operatsiialaryn júrgizýge, onyń ishinde depozitterdi qabyldaýǵa, qaryz operatsiialaryna, investitsiialarmen operatsiialarǵa, ujymdyq investitsiialar qoryn basqarýǵa 2010 jylǵy 30 maýsymdaǵy litsenziiasy (ruqsaty) bar.
2024 jylǵy 1 shildedegi jaǵdai boiynsha Lesha Bank aktivteri 2,05 mlrd AQSh dollaryn, menshikti kapitaly 0,35 mlrd AQSh dollaryn, kapitalynyń jetkiliktilik koeffitsienti 16,9%-dy quraidy. 2023 jyldyń qorytyndysy boiynsha,bank 26,5 mln dollar jáne 2024 jylǵy 6 aida 15,5 mln dollar mólsherinde taza paida alǵan.
