QASYM-JOMART TOQAEV QAZAQSTANDYQTARDY JAZÝShY
BERDIBEK SOQPAQBAEVTYŃ 100 JYLDYQ MEREITOIYMEN
QUTTYQTADY
Almaty oblysy Raiymbek aýdanynyń Narynqol aýylynda qazaq ádebietiniń kórnekti ókili, klassik jazýshy Berdibek Soqpaqbaevtyń 100 jyldyq mereitoiyna arnalǵan eskertkishtiń saltanatty ashylý rásimi ótti.
Is-sharaǵa Memleket basshysynyń tapsyrmasymen Parlament Senatynyń Tóraǵasy Máýlen Áshimbaev qatysyp, jergilikti jurtshylyqqa el Prezidenti Qasym-Jomart Toqaevtyń quttyqtaý hatyn oqyp berdi.
Memleket basshysynyń quttyqtaýynda Berdibek Soqpaqbaev qazaq balalar ádebietiniń damýyna ólsheýsiz úles qosqan qarymdy qalamger ekeni aitylǵan. Onyń «Balalyq shaqqa saiahat», «Meniń atym Qoja», «Ólgender qaityp kelmeidi», «Jekpe-jek» syndy teńdessiz týyndylar jazyp, eshqashan eskirmeitin ǵajaiyp mura qaldyrǵany da nazarǵa alynǵan.
Adam psihologiiasyn, qazaqtyń jan dúniesin asqan sheberlikpen asha bilgen sýretkerdiń shyǵarmalaryndaǵy shynaiy beineler naǵyz halyqtyq keiipkerlerge ainaldy. Birneshe býyn urpaqtyń jazýshy týyndylaryn oqyp ósýi – osynyń aiqyn dáleli.
«Berdibek Soqpaqbaev qazaq ádebietinde eshkimge uqsamaityn qaitalanbas qoltańbasyn qaldyrdy. Ardaqty azamattyń esimin ulyqtap, eńbegin el jadynda jańǵyrtý – bárimizge ortaq paryz.
Osy oraida, jazýshynyń 100 jyldyǵy IýNESKO-nyń ataýly kúnderi tizbesine engizilýi jáne týǵan jerinde sáýletti eskertkishiniń boi kóterýi – áigili sóz zergerine degen qadir-qurmettiń belgisi.
Qalamgerdiń ózine ǵana emes, onyń keiipkerine eskertkish ornatý – óte sirek kezdesetin oqiǵa. Astana tórinde turǵan Qojanyń músini Soqpaqbaev shyǵarmashylyǵynyń ult rýhaniiatynda erekshe oryn alatynyn kórsetedi», – delingen Prezidenttiń quttyqtaýynda.
Máýlen Áshimbaev óz sózinde atalǵan ólkeden Raiymbektei aibyndy batyr men Muqaǵalidai arqaly aqyn shyqqanyn tilge tiek etip, osy óńirdiń tól perzenti Berdibek Soqpaqbaevtyń esimi qazaq ádebietiniń tarihyna altyn árippen jazylǵanyna nazar aýdardy. Sondai-aq ol sońyna qaldyrǵan murasy ulttyń rýhani qazynasyna ainalǵan kórnekti tulǵalardyń esimin ulyqtaý jáne olardy ónegeli ómirin keńinen zerdelep, dáripteý asa mańyzdy ekenin atap ótti.
Palata Spikeri B.Soqpaqbaevtyń shyǵarmashylyǵy árdaiym ózgelerden daralanyp turatynyn jáne olar shynaiylyq pen qarapaiymdylyqqa taban tireitinin aitty. Jazýshynyń týyndylary qazaqstandyqtarmen birge búkil álem oqyrmandarynyń ystyq yqylasyna bólenip, ár býynnyń jadynda saqtalatyn qundy dúniege ainaldy. Qalamgerdiń «Meniń atym Qoja» povesiniń 68 tilge aýdarylýy sonyń jarqyn kórinisi.
Al, shyǵarma jelisimen túsirilgen kinokartina 1967 jyly Kann qalasynda ótken balalar men jasóspirimderge arnalǵan filmderdiń halyqaralyq kinofestivalinde diplomant atandy.
Sonymen qatar Senat Tóraǵasy jas býynnyń boiynda durys qundylyqtar júiesin qalyptastyrý isinde ádebiettiń, ónerdiń jáne kreativti indýstriianyń róli joǵary ekenin, bul máselege Memleket basshysy birneshe márte toqtalǵanyn atap ótti.
«Prezidentimiz Qasym-Jomart Kemeluly Toqaev óskeleń urpaqtyń boiynda oqý mádenietin qalyptastyrýdyń mańyzyna nazar aýdaryp, osy baǵytta «Balalar kitaphanasy» atty jańa baǵdarlamany qolǵa alýdy tapsyrdy. Bul joba qazaq ádebietiniń túrli kezeńderi men janrlaryn qamtityn kitaptardyń arnaiy tizimin jasaqtap, olardyń balalarǵa qoljetimdi bolýy qamtamasyz etýdi kózdeidi. Sondai-aq biyl elde «Ulttyq kitap kúni» belgilendi. Osyndai keshendi sharalardyń barlyǵy qalamgerlerimizdiń esimin máńgilik etýge zor úlesin qosatyny sózsiz. Sondyqtan aldaǵy ýaqytta múddeli memlekettik organdar men Jazýshylar Odaǵy birlese otyryp, osy baǵyttaǵy júieli jumystardy ári qarai jalǵastyrady dep senemiz», – dedi Máýlen Áshimbaev.
Sapar aiasynda Palata Spikeri Qarasaz aýylyna arnaiy at basyn buryp, Muqaǵali Maqataevtyń ádebi-memorialdyq mýzeiine bardy jáne óńirdiń daryndy jastaryn qoldaýǵa arnalǵan Óner mektebiniń ashylý rásimine qatysty.
Berdibek Soqpaqbaevtyń 100 jyldyq mereitoiyna jinalǵan meimandarmen birge jazýshy atyndaǵy saiabaqta aǵash otyrǵyzdy. Odan bólek, Kegen aýylyna baryp, «Qamqorlyq» balalardy ońaltý ortalyǵynyń qyzmetimen tanysty.
Sondai-aq Máýlen Áshimbaev el Prezidenti Qasym-Jomart Toqaevtyń bastamasymen qolǵa alynǵan «Aýyl kitaphanalaryna arnalǵan 100 kitap» aktsiiasyna atsalysty. Palata Tóraǵasy jazýshy Berdibek Soqpaqbaev týǵan Qostóbe aýylyndaǵy mektepke qazaq ádebietiniń klassikteri men sheteldik avtorlardyń kitaptaryn tartý etti. Atap aitqanda, mektep kitaphanasy Berdibek Soqpaqbaevpen birge Abai, Ybyrai Altynsarin, Muhtar Áýezov, Shyńǵys Aitmatov, Ernest Hemingýei, Daniel Defo, Ivan Týrgenev, Jiýl Vern jáne basqa da jazýshylar men aqyndardyń shyǵarmalarymen tolyqty.
