Shymkent qalalyq politsiia departamenti qala ákiminiń orynbasary Rýslan Berdenovke jasalǵan shabýylǵa qatysty alǵashqy resmi túsinikteme berdi, dep habarlaidy Dalanews.kz.
«Osy jyldyń 21 sáýiri kúni Shymkent qalasy ákimdiginiń ǵimaraty mańynda atys qarýy qoldanylǵan oqiǵa oryn aldy. Sonyń saldarynan ákimdik qyzmetkeri jaraqat alyp, aýrýhanaǵa jatqyzyldy. Qazirgi ýaqytta zardap shegýshige qajetti meditsinalyq kómek tolyq kólemde kórsetilýde», – delingen politsiia habarlamasynda.
Quqyq qorǵaý organdarynyń deregi boiynsha, qylmysqa qatysy bar degen kúdikpen bir adam ustalyp, ýaqytsha ustaý izoliatoryna qamaldy.
«Atalǵan fakti boiynsha qylmystyq is qozǵaldy. Qazir jan-jaqty tergeý amaldary júrgizilip, oqiǵanyń barlyq mán-jaiy muqiiat tekserilip jatyr. Tergeý múddesine sai, ózge aqparat ázirge jariia etilmeidi», – dep tolyqtyrdy politsiia ókilderi.
Aita keteiik, buǵan deiin ákimdik ǵimaraty janynda qala ákiminiń orynbasary Rýslan Berdenovke úsh ret oq atylyp, aýyr jaralanǵany habarlanǵan bolatyn.
Keibir derekkózder shabýyl jasaǵan kúdikti retinde ákimdikke qarasty «Turǵyn úi Shymkent» JShS qyzmetkeri Ernar Jienbaiulynyń atyn ataǵan edi. Qazir Berdenovtyń jaǵdaiy týraly naqty aqparat kútilýde.
