شىمكەنت قالالىق پوليسيا دەپارتامەنتى قالا اكىمىنىڭ ورىنباسارى رۋسلان بەردەنوۆكە جاسالعان شابۋىلعا قاتىستى العاشقى رەسمي تۇسىنىكتەمە بەردى، دەپ حابارلايدى Dalanews.kz.
«وسى جىلدىڭ 21 ءساۋىرى كۇنى شىمكەنت قالاسى اكىمدىگىنىڭ عيماراتى ماڭىندا اتىس قارۋى قولدانىلعان وقيعا ورىن الدى. سونىڭ سالدارىنان اكىمدىك قىزمەتكەرى جاراقات الىپ، اۋرۋحاناعا جاتقىزىلدى. قازىرگى ۋاقىتتا زارداپ شەگۋشىگە قاجەتتى مەديسينالىق كومەك تولىق كولەمدە كورسەتىلۋدە»، – دەلىنگەن پوليسيا حابارلاماسىندا.
قۇقىق قورعاۋ ورگاندارىنىڭ دەرەگى بويىنشا، قىلمىسقا قاتىسى بار دەگەن كۇدىكپەن ءبىر ادام ۇستالىپ، ۋاقىتشا ۇستاۋ يزولياتورىنا قامالدى.
«اتالعان فاكتى بويىنشا قىلمىستىق ءىس قوزعالدى. ءقازىر جان-جاقتى تەرگەۋ امالدارى جۇرگىزىلىپ، وقيعانىڭ بارلىق ءمان-جايى مۇقيات تەكسەرىلىپ جاتىر. تەرگەۋ مۇددەسىنە ساي، وزگە اقپارات ازىرگە جاريا ەتىلمەيدى»، – دەپ تولىقتىردى پوليسيا وكىلدەرى.
ايتا كەتەيىك، بۇعان دەيىن اكىمدىك عيماراتى جانىندا قالا اكىمىنىڭ ورىنباسارى رۋسلان بەردەنوۆكە ءۇش رەت وق اتىلىپ، اۋىر جارالانعانى حابارلانعان بولاتىن.
كەيبىر دەرەككوزدەر شابۋىل جاساعان كۇدىكتى رەتىندە اكىمدىككە قاراستى «تۇرعىن ءۇي شىمكەنت» ج ش س قىزمەتكەرى ەرنار جيەنباي ۇلىنىڭ اتىن اتاعان ەدى. ءقازىر بەردەنوۆتىڭ جاعدايى تۋرالى ناقتى اقپارات كۇتىلۋدە.
