Shymkent ákiminiń orynbasary Rýslan Berdenovke jasalǵan qastandyq isi boiynsha sot otyrysynda kýálerden jaýap alynyp jatyr, dep habarlaidy Dalanews.kz.
Ulysmedia.kz málimetinshe, sotta kýá Arai Qamytbekova sol kúni ákimdik aldynda myltyq atylǵannan keiin politsiia shaqyrǵanyn aitqan. Ol sol kúngi oqiǵany bylai dep sipattady:
"Bul kisi sol adamdarǵa qarata oq atty. Birinshi oq atylǵanda men birden 102 batyrmasyn basyp, politsiia qyzmetkerlerine baiandadym, osyndai-osyndai ákimdik aldynda dep. Solai baiandap jatqanda ýaqytta úsh-tórt ret taǵy da oq atyldy. Ol kezde klassika kiingen kisi júgirip júrdi. Bul kisi artynan qýalap júrdi. Sol kezde mashinada bir er kisi boldy. Sol kisi bul kisini tartyp qulatty jerge. Bul kisi qulaǵannan keiin meniń qurbym sol jaqqa qarai júgirdi. Men 102 qyzmetkerine túsindire almai jatyrmyn. Olar suraq qoia bastady. Men trýbkany qoiamyn. Bul kisini ákimdikten shyqqan kisiler jerge jatqan jerinde teris qaratyp ustap tur eken. Jerde jaraqattanyp jatqan kisige baramyn. Sol kisiniń aldynda otyramyn. Sol kezde bir estigen sózim "ol meniń áielim edi ǵoi" dedi me, sondai sóz shyqty. "Seniń kesirińnen men qazir sottan kele jatyrmyn" dedi nemese "sotqa shaǵymdanyp jatyrmyn" dedi. Bul kisini kúshtep jatqan kezde "óltiremin" dep sol kisige qarai oqtalyp, ornynan turmaqshy boldy. Úsh-tórt kisi bul kisini ustap turdy. Sol aralyqta politsiia qyzmetkerleri keldi", – dedi ol.
Buǵan deiingi jaǵdai
Eske salaiyq, buǵan deiin Rýslan Berdenov sotqa kelýge mindettelgeni habarlandy. Sot otyrysynda sýdia Ábinur Qarabaev Rýslan Berdenovti 6 tamyzǵa josparlanǵan negizgi sot protsesine mindetti túrde qatysýǵa shaqyrdy.
Sebebi Rýslan Berdenov aldyn ala tyńdaýǵa ózi kelmegen edi. Onyń ókili Rýslan Berdenov em qabyldap jatqanyn málimdedi.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Artynsha kúdikti ustalyp, ýaqytsha ustaý izoliatoryna qamaldy, bul derek boiynsha qylmystyq is qozǵaldy.
Bul is boiynsha basty kúdikti - Ernar Jiembai. Ashyq formatta ótken aldyn ala tyńdaý kezinde sýdia Jiembaidyń sot protsesi barysynda ózin túsirýge qarsy ekenin jetkizdi.
