Shymkent qalasy ákiminiń orynbasary Rýslan Berdenov detektor arqyly tekserýden ótýge daiyn ekenin sot otyrysynda aitty, dep habarlaidy Dalanews.kz.
Sotta Berdenov aiyptalýshy Ernar Jienbaimen ótken jumys kezdesýleri týraly aityp berdi. Onyń sózinshe, alǵashqy kezdesýge Jienbai daiyn kelmegen, qoiylǵan suraqtarǵa jaýap bere almaǵan.
"Alǵashqy kezdesýde Ernar esep bermedi, biýdjettiń qalai qalyptasatynyn túsindirmedi, inspektormen tipti meniń kózimshe daýlasa bastady. Maǵan onyń kóp kólemde qurylys materialdaryn satyp alyp jatqany týraly aqparat túsken edi, biraq suraǵanymda eshteńe aita almady. Bizde daýys kóterip urysqan jaǵdai bolǵan joq... Sol kezde men: «Osylai jalǵassa, biz birge jumys istei almaimyz» dedim. Ol: «Men jumystan kete alamyn» dedi. Men: «Onda ket» dep jaýap berdim", – dedi Berdenov.
Zardap shegýshiniń aitýynsha, ekinshi kezdesý áldeqaida sabyrly ótken. Berdenovtiń sózinshe, Jienbai ol kezde alǵysyn aityp, tipti qushaqtaǵan.
"Ekinshi kezdesýde ol: «Biz búkil januiamyzben sizdi qurmetteimiz, siz – bizdiń kýmirimizsiz» dedi de, meni qushaqtady. Biz 2–3 minýt qana sóilestik. Osydan keiin áriptesterime: «Bir-eki aidan keiin ózi-aq ketedi, baqylaýda ustańdar» dedim", – dedi ákimniń orynbasary.
Berdenov óz kórsetilimderin poligraf arqyly rastaýǵa daiyn ekenin jetkizdi. Sondai-aq ol eshkimniń keshirim suramaǵanyn atap ótti. Onyń aitýynsha, aiyptalýshynyń jubaiynyń aǵasy Nǵashbek Aljanov eger Berdenov Jienbaidy keshirmese, oǵan qarsy túrli aiyptaýlar qoiyla bastaýy múmkin ekenin eskertken.
