شىمكەنت قالاسى ەكٸمٸنٸڭ ورىنباسارى رۋسلان بەردەنوۆ دەتەكتور ارقىلى تەكسەرۋدەن ٶتۋگە دايىن ەكەنٸن سوت وتىرىسىندا ايتتى, دەپ حابارلايدى Dalanews.kz.
سوتتا بەردەنوۆ ايىپتالۋشى ەرنار جيەنبايمەن ٶتكەن جۇمىس كەزدەسۋلەرٸ تۋرالى ايتىپ بەردٸ. ونىڭ سٶزٸنشە, العاشقى كەزدەسۋگە جيەنباي دايىن كەلمەگەن, قويىلعان سۇراقتارعا جاۋاپ بەرە الماعان.
"العاشقى كەزدەسۋدە ەرنار ەسەپ بەرمەدٸ, بيۋدجەتتٸڭ قالاي قالىپتاساتىنىن تٷسٸندٸرمەدٸ, ينسپەكتورمەن تٸپتٸ مەنٸڭ كٶزٸمشە داۋلاسا باستادى. ماعان ونىڭ كٶپ كٶلەمدە قۇرىلىس ماتەريالدارىن ساتىپ الىپ جاتقانى تۋرالى اقپارات تٷسكەن ەدٸ, بٸراق سۇراعانىمدا ەشتەڭە ايتا المادى. بٸزدە داۋىس كٶتەرٸپ ۇرىسقان جاعداي بولعان جوق... سول كەزدە مەن: «وسىلاي جالعاسسا, بٸز بٸرگە جۇمىس ٸستەي المايمىز» دەدٸم. ول: «مەن جۇمىستان كەتە الامىن» دەدٸ. مەن: «وندا كەت» دەپ جاۋاپ بەردٸم", – دەدٸ بەردەنوۆ.
زارداپ شەگۋشٸنٸڭ ايتۋىنشا, ەكٸنشٸ كەزدەسۋ ەلدەقايدا سابىرلى ٶتكەن. بەردەنوۆتٸڭ سٶزٸنشە, جيەنباي ول كەزدە العىسىن ايتىپ, تٸپتٸ قۇشاقتاعان.
"ەكٸنشٸ كەزدەسۋدە ول: «بٸز بٷكٸل جانۇيامىزبەن سٸزدٸ قۇرمەتتەيمٸز, سٸز – بٸزدٸڭ كۋميرٸمٸزسٸز» دەدٸ دە, مەنٸ قۇشاقتادى. بٸز 2–3 مينۋت قانا سٶيلەستٸك. وسىدان كەيٸن ەرٸپتەستەرٸمە: «بٸر-ەكٸ ايدان كەيٸن ٶزٸ-اق كەتەدٸ, باقىلاۋدا ۇستاڭدار» دەدٸم", – دەدٸ ەكٸمنٸڭ ورىنباسارى.
بەردەنوۆ ٶز كٶرسەتٸلٸمدەرٸن پوليگراف ارقىلى راستاۋعا دايىن ەكەنٸن جەتكٸزدٸ. سونداي-اق ول ەشكٸمنٸڭ كەشٸرٸم سۇراماعانىن اتاپ ٶتتٸ. ونىڭ ايتۋىنشا, ايىپتالۋشىنىڭ جۇبايىنىڭ اعاسى نعاشبەك الجانوۆ ەگەر بەردەنوۆ جيەنبايدى كەشٸرمەسە, وعان قارسى تٷرلٸ ايىپتاۋلار قويىلا باستاۋى مٷمكٸن ەكەنٸن ەسكەرتكەن.
