Shymkentte kásipker ári qala ákiminiń orynbasary Rýslan Berdenovke jasalǵan shabýylǵa qatysty qylmystyq is boiynsha sot protsesi jalǵasyp jatyr. Kezekti tyńdalymda eki kýáger qalalyq qurylys basqarmasyna qarasty monitoring bóliminiń basshysy Amanǵali Kenjebekov pen Berdenovtiń kómekshisi Talap Rahymberdievtiń jaýaby tyńdaldy, dep habarlaidy Dalanews.kz Qazinformǵa silteme jasap.
Kýáger Kenjebekovtiń aitýynsha, qylmysqa deiin birneshe kún buryn basqarma basshysynyń orynbasary Erdáýlet Ájibaev oǵan "Turǵyn úi Shymkent" JShS direktory Ernar Jiembaidyń óz erkimen jumystan ketetini jaiynda surastyryp kórýdi tapsyrǵan.
"Men Jiembaiǵa habarlastym. Ol "maǵan bir ai ýaqyt berilgen, túsindim" dep jaýap qatty", – dedi Kenjebekov sotta.
Onyń aitýynsha, kadrlyq qujat ainalymyn júrgizý onyń qyzmettik mindetine kirgenimen, Jiembaiǵa qatysty eshqandai tártiptik jaza qoldaný nemese jumystan bosatý týraly buiryq bolmaǵan.
Sotta jaýap bergen Talap Rahymberdiev aiyptalýshy Jiembaimen qyzmettik jiyndarda birneshe ret kezdeskenin, alaida eshqandai ashyq janjal nemese kelispeýshilik baiqamaǵanyn aitty. Degenmen, bir otyrysta Jiembaidyń slaid-prezentatsiiasy daiyn bolmai, tehnikalyq irkilis oryn alǵanyn, sonymen qatar kiim kiisi resmi standartqa sai kelmegenin jetkizdi.
"Birde ol maǵan telefon soǵyp, "Rýslanǵa bershi telefondy" dedi. Men oǵan sýbordinatsiia saqtalýy keregin eskerttim. Biraq keiin taǵy qońyraý shalyp, Berdenovtiń úiine barýy múmkin ekenin aitty", – dedi kómekshi.
Rahymberdiev Jiembaidyń jumystan ketý týraly bir ai merzim suraǵanynan habardar bolǵanyn, biraq onyń sebebin túsindirmegenin de atap ótti.
Sot tergeýi jalǵasýda
Atalǵan iske qatysty qylmystyq sot protsesi áli de jalǵasyp jatyr. Aldaǵy otyrystarda jańa kýágerlerdiń jaýaptary men tergeý materialdary jariialanady dep kútilýde.
