شىمكەنتتە كەسٸپكەر ەرٸ قالا ەكٸمٸنٸڭ ورىنباسارى رۋسلان بەردەنوۆكە جاسالعان شابۋىلعا قاتىستى قىلمىستىق ٸس بويىنشا سوت پروتسەسٸ جالعاسىپ جاتىر. كەزەكتٸ تىڭدالىمدا ەكٸ كۋەگەر قالالىق قۇرىلىس باسقارماسىنا قاراستى مونيتورينگ بٶلٸمٸنٸڭ باسشىسى امانعالي كەنجەبەكوۆ پەن بەردەنوۆتٸڭ كٶمەكشٸسٸ تالاپ راحىمبەرديەۆتٸڭ جاۋابى تىڭدالدى, دەپ حابارلايدى Dalanews.kz قازينفورمعا سٸلتەمە جاساپ.
كۋەگەر كەنجەبەكوۆتٸڭ ايتۋىنشا, قىلمىسقا دەيٸن بٸرنەشە كٷن بۇرىن باسقارما باسشىسىنىڭ ورىنباسارى ەردەۋلەت ەجٸباەۆ وعان "تۇرعىن ٷي شىمكەنت" جشس ديرەكتورى ەرنار جيەمبايدىڭ ٶز ەركٸمەن جۇمىستان كەتەتٸنٸ جايىندا سۇراستىرىپ كٶرۋدٸ تاپسىرعان.
"مەن جيەمبايعا حابارلاستىم. ول "ماعان بٸر اي ۋاقىت بەرٸلگەن, تٷسٸندٸم" دەپ جاۋاپ قاتتى", – دەدٸ كەنجەبەكوۆ سوتتا.
ونىڭ ايتۋىنشا, كادرلىق قۇجات اينالىمىن جٷرگٸزۋ ونىڭ قىزمەتتٸك مٸندەتٸنە كٸرگەنٸمەن, جيەمبايعا قاتىستى ەشقانداي تەرتٸپتٸك جازا قولدانۋ نەمەسە جۇمىستان بوساتۋ تۋرالى بۇيرىق بولماعان.
سوتتا جاۋاپ بەرگەن تالاپ راحىمبەرديەۆ ايىپتالۋشى جيەمبايمەن قىزمەتتٸك جيىنداردا بٸرنەشە رەت كەزدەسكەنٸن, الايدا ەشقانداي اشىق جانجال نەمەسە كەلٸسپەۋشٸلٸك بايقاماعانىن ايتتى. دەگەنمەن, بٸر وتىرىستا جيەمبايدىڭ سلايد-پرەزەنتاتسيياسى دايىن بولماي, تەحنيكالىق ٸركٸلٸس ورىن العانىن, سونىمەن قاتار كيٸم كيٸسٸ رەسمي ستاندارتقا ساي كەلمەگەنٸن جەتكٸزدٸ.
"بٸردە ول ماعان تەلەفون سوعىپ, "رۋسلانعا بەرشٸ تەلەفوندى" دەدٸ. مەن وعان سۋبورديناتسييا ساقتالۋى كەرەگٸن ەسكەرتتٸم. بٸراق كەيٸن تاعى قوڭىراۋ شالىپ, بەردەنوۆتٸڭ ٷيٸنە بارۋى مٷمكٸن ەكەنٸن ايتتى", – دەدٸ كٶمەكشٸ.
راحىمبەرديەۆ جيەمبايدىڭ جۇمىستان كەتۋ تۋرالى بٸر اي مەرزٸم سۇراعانىنان حاباردار بولعانىن, بٸراق ونىڭ سەبەبٸن تٷسٸندٸرمەگەنٸن دە اتاپ ٶتتٸ.
سوت تەرگەۋٸ جالعاسۋدا
اتالعان ٸسكە قاتىستى قىلمىستىق سوت پروتسەسٸ ەلٸ دە جالعاسىپ جاتىر. الداعى وتىرىستاردا جاڭا كۋەگەرلەردٸڭ جاۋاپتارى مەن تەرگەۋ ماتەريالدارى جارييالانادى دەپ كٷتٸلۋدە.
