Shymkent qalasy ákiminiń orynbasary Rýslan Berdenov ákimdiktegi qyzmetinen ketýi múmkin. Bul týraly qala ákiminiń taǵy bir orynbasary Sarsen Quranbek málimdedi, dep habarlaidy Dalanews.kz.
Onyń aitýynsha, Berdenov eńbekke jaramsyzdyq paraǵyn ashyp, em qabyldap jatyr.
“Bizdiń bilýimizshe, Rýslan Berdenov ákimdiktegi qyzmetin aiaqtaýdy oilap otyr. Ondai jaǵdaida ol tiisti ótinish jazýy múmkin. Bul – ár adamnyń jeke tańdaýy men qalaýy. Árine, ol densaýlyǵyna kóńil bólýdi jón kórgen siiaqty. Alaida resmi túrde qyzmetten bosatý týraly buiryq shyqpaiynsha, ol qala ákiminiń orynbasary bolyp esepteledi”, – dedi Quranbek Óńirlik kommýnikatsiialar qyzmetindegi brifingte.
Quranbektiń aitýynsha, eńbekke jaramsyzdyq paraǵy bolǵan jaǵdaida azamat úsh aiǵa deiin resmi túrde emdele alady. Keiin dárigerler bul merzimdi taǵy úsh aiǵa uzartýy múmkin. Al alty ai merzim ótkennen keiin ǵana jumys berýshi tarapynan sheshim qabyldanady.
“Berdenov bul merzimdi ázirge asqan joq. Barlyǵy zań aiasynda”, – dedi ol.
Sondai-aq Quranbek Berdenovti qyzmetten bosatý týraly buiryqtyń áli shyqpaǵanyn atap ótti.
Aita keteiik, buǵan deiin áleýmettik jelide Rýslan Berdenovtiń Shymkent ákimi orynbasary qyzmetinen bosatylǵany týraly aqparat taraǵan edi.
Rýslan Berdenov bul qyzmetke 2025 jyly aqpanda taǵaiyndaldy. Alaida 21 sáýir kúni oǵan qarýly shabýyl jasaldy. Sheneýnik oq jaraqatyn alyp, aýrýhanaǵa jetkizildi.
Sot úkimi boiynsha kúdikti dep tanylǵan Ernar Jienbaiǵa 9 jylǵa sottaldy.
Eske salaiyq, memlekettik aiyptaýshy burynǵy sheneýniktiń orynbasaryna 11 jyl 3 ai bas bostandyǵynan aiyrý jazasyn suraǵan edi. Berdenov bes oq jaraqatyn alyp, ota ústeline túsken bolatyn.
