Qazaqstandyq MMA faiteri Qýat Hamitov Atyraýda túsirilgen daýly videodan keiin ákimshilik jaýapkershilikke tartyldy. Politseiler sportshyny jáne videoǵa qatysqan ózge adamdardy jol qozǵalysy erejelerin óreskel buzǵany úshin aiyppul salǵan, dep habarlaidy dalanews.kz.
Áleýmettik jeli qoldanýshylarynyń narazylyǵyn týdyrǵan kadrlar Instagram jelisindegi afishi_atyrau paraqshasynda jariialanǵan. Videoda qyzdyń Ábilqaiyr han dańǵylymen qozǵalyp kele jatqan kóliktiń terezesinen denesin shyǵaryp, faitermen amandasqany kórinedi. Al Qýat Hamitov kólikti qaýipsizdik beldigin taqpai basqarǵan.
Rolik 23 mamyr kúni ótetin Batyr Fighting Championship týrniriniń jarnamasy retinde túsirilgen. Atalǵan týrnirde Qýat Hamitov irandyq Ali Heibatimen jekpe-jek ótkizýi tiis. Alaida jeli qoldanýshylary mundai «kreativti» qoldamai, jol erejesin buzǵandardy jazalaýdy talap etken.
Atyraý oblystyq politsiia departamentiniń baspasóz qyzmeti áleýmettik jelidegi jariialanymǵa bailanysty tekserý júrgizilgenin habarlady.
Tekserý nátijesinde Toyota Camry kóligindegi 24 jáne 22 jastaǵy jolaýshylar qaýipsizdik beldigin taqpaǵany jáne kólik salonynan denesin shyǵarǵany úshin jaýapkershilikke tartylǵan. Sonymen qatar atalǵan kólikti basqarǵan 20 jastaǵy júrgizýshige de ákimshilik shara qoldanylǵan.
Ákimshilik jaýapkershilikke 38 jastaǵy Qýat Hamitov ta tartyldy. Ol Mustang markaly qymbat kólikti qaýipsizdik beldigin taqpai basqarǵan.
Sondai-aq Mustang avtokóliginiń 38 jastaǵy júrgizýshisi qaýipsizdik beldigin taqpai kólik basqarǵany úshin ákimshilik jaýapkershilikke tartyldy, – dep habarlady politsiia departamentiniń baspasóz qyzmeti.
Tártip saqshylary barlyq júrgizýshi men jolaýshyny jol qozǵalysy erejelerin qatań saqtaýǵa shaqyryp, zań buzýshylyq úshin jaza mindetti túrde qoldanylatynyn eskertti.
