Memlekettik kirister komıteti premer-mınıstr Oljas Bektenovtiń eskertýinen keıin «Bazis-A» jáne «Bi Group» qansha somada salyq kirisin tómendetip kórsetkeni jóninde aqparat berdi, - dep habarlaıdy Dalanews.kz Ulysmedia.kz-ke siltep.
Qansha salyq bereshek?
Memlekettik kirister organdary «Bazis-A» kompanıasyna 4,6 mlrd teńge, «Bi Group» kompanıasyna 11,9 mlrd teńge mólsherinde salyqqa jatatyn kiris tómendetip kórsetilgeni jóninde habarlama jibergen.
"Bul jumys 2022-2023 jyldar aralyǵynda arnaıy salyq rejımderin (ASR) qoldanatyn sýbektiler men jalpyǵa birdeı belgilengen tártipte jumys isteıtin kompanıalar arasyndaǵy ózara esep aıyrysýlardy taldaý sheńberinde júrgizilgen. Taldaý nátıjesinde bul kompanıalardyń ASR-dy salyqtyq tólemderin azaıtý maqsatynda paıdalanǵany anyqtalǵan. Kameraldyq baqylaý rásimi salyq tóleýshilerge tekseris júrgizbeı-aq óz kiristerin túzetip, salyqtaryn tóleýge múmkindik beretinin túsindiremiz", - dep eskertti salyq organdary.
"Sońy qıyn bolady". Úkimet basshysy Bektenovtiń eskertýi
28 aqpanda premer-mınıstr Oljas Bektenov vıse-premer-ulttyq ekonomıka mınıstri Serik Jumanǵarınmen jáne qarjy mınıstri Mádı Takıevpen birge jumys keńesin ótkizdi. Keńeste salyq-búdjet reformasy jáne salyq túsimderin baqylaýdy kúsheıtý máseleleri qaraldy.
Qarjy mınıstri Mádı Takıev júrgizilgen taldaý sheńberinde salyq tóleýshiler shaǵyn kásipkerlikti qoldaý jáne damytý maqsatynda buryn engizilgen arnaıy salyq rejımderin (SRP) paıdalanǵany anyqtalǵanyn baıandady.
"Qarjy mınıstriniń aqparatynan salyq júktemesin ońtaılandyrýdyń ártúrli shemalaryn qoldana otyryp, mindetin adal atqarmaıtyn kásipkerler baryn kórip otyrmyz. Mıllıardtaǵan aınalymmen olar búdjetke ózderiniń tapqan paıdasyna múldem sáıkes kelmeıtin somalardy tóleıdi. Bizde osyndaı iri kompanıalardyń tolyq tizimi bar. Ol tizimde BI Group, BAZIS jáne basqa da kóptegen iri qurylys kompanıasy júr. Ekonomıkanyń basqa salalarynda jumys isteıtin belgili ári tanymal meıramhanalar, fıtnes-klýbtar jáne ártúrli kompanıalar bar. Osy múmkindikti paıdalana otyryp, qazir salyq júktemesin ońtaılandyrýdyń túrli shemalaryn qoldanatyn iri kompanıalardyń ıeleri men basshylaryna qarata aıtqym keledi. Búgin-erteń sizderdiń kompanıalaryńyzǵa salyq organdarynan qosymsha salyq somalaryn tóleý qajettiligi týraly habarlamalar kelip túsedi", - dedi Bektenov.
Oljas Bektenov kásipkerlerden eki apta ishinde salyq organdaryna qosymsha salyq deklarasıalaryn tapsyrýdy jáne shynaıy salyq somasyn tóleýdi surady.
"Eger bul áreketter jasalmasa, memleket fıskaldyq jáne quqyq qorǵaý organdaryn qosqanda, memleket ıeligindegi barlyq resýrsty qoldaný quqyǵyn ózine qaldyrady. Munyń sońy qıyn bolady, biraq eger bıznes memleket aldyndaǵy mindettemesin ádiletti túrde oryndaýǵa daıyn bolsa, biz dıalogqa daıynbyz", - dedi Oljas Bektenov.
