Premer-ministr Oljas Bektenov Soltústik Qazaqstan oblysyna jumys sapary barysynda kóktemgi egis jumystarynyń qorytyndysy men agroónerkásip keshenin damytý máseleleri boiynsha keńes ótkizdi, dep habarlaidy dalanews.kz.
Úkimet basshysy iri agrokásiporyndardy aýyl turǵyndaryn jyl boiy jumyspen qamtýǵa shaqyryp, bul talap oryndalmaǵan jaǵdaida jerdi qaitarý máselesi qaralatynyn málimdedi.
Aýyl sharýashylyǵy ministri Aidarbek Saparovtyń aitýynsha, biyl elimizde aýyl sharýashylyǵy daqyldary 23,8 mln gektar alqapqa egilgen. Bul ótken jylmen salystyrǵanda 180 myń gektarǵa kóp. Onyń ishinde dándi jáne burshaqty daqyldar 15,8 mln gektardy, maily daqyldar 4,3 mln gektardy, al mal azyǵy daqyldary 3,3 mln gektardy alyp jatyr.
Keńes barysynda agroónerkásip keshenine quiylyp jatqan investitsiialar men memlekettik qoldaý sharalary da talqylandy. Sońǵy eki jylda elde 540 jańa agroónerkásip nysany paidalanýǵa berilgen. Olardyń qatarynda mal sharýashylyǵy keshenderi, sút-taýar fermalary, qus fabrikalary, kókónis qoimalary men qaita óńdeý kásiporyndary bar.
Premer-ministr memleket tarapynan kórsetiletin qoldaýǵa sáikes biznestiń de áleýmettik jaýapkershiligi bolýy tiis ekenin aitty.
«Iri sharýashylyqtar jyl boiy jumyspen qamtýdy qamtamasyz etýi kerek. Bul – sizderge qoiylatyn negizgi talaptardyń biri. Memleket qajetti qoldaý kórsetip otyr. Biraq biz iri biznesten de naqty mindettemeler kútemiz. Eger bul baǵytta jumys júrgizilmese, ondai jer ielerinen jerdi qaitarý máselesimen ainalysamyz», – dedi Oljas Bektenov.
Jiynda mal sharýashylyǵyn damytý máselesine de erekshe nazar aýdaryldy. Úkimet málimetinshe, jyl basynan beri elimizde barlyq sanattaǵy et óndirisi 338 myń tonnaǵa jetip, ótken jyldyń sáikes kezeńimen salystyrǵanda 3,4 paiyzǵa artqan. Onyń ishinde siyr eti óndirisi 6,1 paiyzǵa, qoi eti 8,1 paiyzǵa ósken.
Premer-ministr veterinariialyq qaýipsizdik salasyndaǵy jumystardy da erekshe atap ótti. Sońǵy eki jylda óńirlerde shamamen 600 veterinariialyq nysan salynyp, bul maqsatqa 9,1 mlrd teńge jumsalǵan. Nátijesinde Qazaqstan resmi túrde aýsyldan taza el mártebesin alǵan.
Úkimet basshysy bul mártebeni saqtaý úshin veterinariialyq baqylaýdy kúsheitýdi tapsyrdy.
Sonymen qatar keńeste sý tapshylyǵy qaýpi talqylandy. «Qazgidromet» boljamyna sáikes, shilde-qyrkúiek ailarynda birqatar óńirlerde ylǵal tapshylyǵy baiqalýy múmkin. Osyǵan bailanysty premer-ministr tiisti ministrlikter men ákimdikterge egistikterdi sýmen qamtamasyz etý máselesin turaqty baqylaýda ustaýdy tapsyrdy.
Biyl agroónerkásip keshenin qarjylandyrýǵa 1,2 trln teńgeden astam qarajat qarastyrylǵan. Onyń ishinde kóktemgi egis pen kúzgi jiyn-terim jumystaryna 750 mlrd teńgege deiin qarjy baǵyttalmaq. Qazirgi tańda sharýalarǵa 573 mlrd teńge kóleminde nesie berilgen.
