Bektaevtyń aıtýynsha, jańa jyl merekesin toılaý úlken shyǵynǵa alyp keledi.
“Jańa jyl qarsańynda barlyq qalada qyzý jumys bastalady. Merekeni toılaý barysynda kóp jaǵdaıda ysyrapshyldyqqa jol berip jatamyz. Atap aıtatyn bolsaq, búdjet qarjysyna muz syrǵanaqtar men túrli otshashýlar uıymdastyrylady. Al qarapaıym halyq saýda ortalyqtaryn aralap, josparsyz aqsha jumsaıdy” - deıdi, senator.
Sonymen qatar ol elimizde jańa jyldy atap ótýdiń jańa ıdeologıalyq-áleýmettik negizin qalyptastyrýdyń ýaqyty kelgenin jetkizdi.
“Elimizde úsh myń jyldyq tarıhy bar Naýryz meıramyn erekshe qarsy alýdy qolǵa alýymyz qajet. Naýryz molynan dastarqan jaıyp, júzdegen kıiz úı tigip, ysyrapshyldyqqa jol beretin meıram emes, kerisinshe ár otbasyǵa rýhanı nár beretin jańa merekege aınalýy qajet. Naýryz – basty ulttyq ıdeologıamyz ekenin eskergen jón” - dedi, Bektaev.
Senatordyń pikirinshe, Naýryz merekesine oraı ótken jyldy qorytyndylap, eńbek ujymdary men eńbek ozattaryn marapattaýdy jyl saıyn dástúrge engizý qajet.
Osy tusta Álı Bektaev Naýryz merekesin dáripteıtin jalpyulttyq tujyrymdamany qabyldaýdy jáne Naýryz meıramynyń mańyzyn zertteıtin ǵylymı ortalyq qurýdy usyndy.
