Qazaq Expert Club sarapshysy, qarjyger Venera Janalina Ulttyq banktiń bazalyq mólsherlemeni 17%-dan 16,75%-ǵa deiin tómendetýi depozit pen nesiege birtindep áser etýi múmkin ekenin aitty. Alaida mólsherleme nebári 0,25 paiyzdyq tarmaqqa tómendegendikten, kúrt ózgerister bolmaidy, dep habarlaidy dalanews.kz.
Depozitterge qalai áser etedi?
Venera Janalinanyń aitýynsha, bankter jańa teńgelik depozitter boiynsha syiaqy mólsherlemesin birtindep tómendetýi múmkin. Degenmen salymshylar úshin básekelestik joǵary bolǵandyqtan, bul ózgeris birden bolmaidy.
Qoldanystaǵy belgilengen mólsherlememen ashylǵan depozitterdiń sharttary kelisimshart merzimi aiaqtalǵanǵa deiin ózgermeidi. Sondyqtan uzaq merzimge depozit ashýdy josparlaǵandar qazirgi mólsherlemeni saqtap qala alady. Biraq merziminen buryn aqsha sheship alý sharttaryn eskergen jón.
Nesiege qatysty ne ózgeredi?
Sarapshynyń sózinshe, jańa nesielerdiń paiyzdyq mólsherlemesi de birtindep tómendeýi múmkin. Biraq bul protsess depozitterge qaraǵanda baiaý júredi.
Óitkeni nesie quny tek bazalyq mólsherlemege emes, banktiń qarjy tartý shyǵyndaryna, operatsiialyq shyǵyndaryna, kapitalǵa qoiylatyn talaptarǵa jáne banktiń marjasyna bailanysty qalyptasady.
Qazir rásimdelgen nesielerdiń basym bóliginiń sharttary ózgermeidi. Al jańa nesieler boiynsha paiyzdyq mólsherlemeler bankter óz ónimderin qaita qaraǵan jaǵdaida ǵana tómendeýi yqtimal.
Venera Janalinanyń pikirinshe, eń aldymen korporativtik nesielerde, avtonesielerde jáne kommertsiialyq ipotekada paiyzdyq mólsherleme tómendeýi múmkin. Al tutynýshylyq nesie qymbat bolyp qala beredi.
Qorytyndy
Sarapshynyń aitýynsha, qazir bazalyq mólsherleme infliatsiia deńgeiinen shamamen 6,45 paiyzdyq tarmaqqa joǵary. Bul aqsha-nesie saiasaty áli de qatań ekenin jáne arzan nesieler kezeńi bastaldy deýge erte ekenin kórsetedi.
