Úkimettiń ekonomikalyq ósýdi qamtamasyz etý jónindegi is-qimyl jospary sheńberinde «Báiterek» ulttyq basqarýshy holdingi» AQ Qazaqstan ekonomikasyna shamamen 3,5 trln teńge somasynda qoldaý kórsetýdi josparlap otyr. Bul týraly Úkimet otyrysynda QR Premer-Ministri Oljas Bektenov málimdedi.
«Úkimet «Samuryq-Qazyna» jáne «Báiterek» holdingteriniń, ishki kapital naryǵynyń resýrstary men qarajatyn, ekonomika úshin basym jobalardy qarjylandyrýǵa tikelei sheteldik investitsiialar men jeke kapitaldy belsendi túrde tartady. «Báiterek» jelisi boiynsha aǵymdaǵy jyly 3 trln teńgeden astam somaǵa jobalardy qarjylandyrý josparlanýda», - dep tolyqtyrdy Oljas Bektenov.
Qoldaýdyń negizgi bóligi tikelei qoldaý quraldary arqyly kórsetiletin bolady, oǵan 2,8 trln teńge bólinedi. Bul qarajat kelesidei bólinedi:
• ekonomikanyń naqty sektorynyń jobalaryn qarjylandyrý: shamamen 1,4 trln teńge;
• kóktemgi egis jáne egin jinaý jumystaryn qosa alǵanda, agroónerkásiptik keshen jobalaryn qarjylandyrý: 0,5 trln teńgeden astam;
• turǵyn úi blogyn qoldaý: shamamen 0,4 trln teńge;
• «Naýryz» jáne «Otaý» ipotekalyq baǵdarlamalaryn iske asyrý: 0,4 trln teńge;
• eksporttaýshylar men shaǵyn jáne orta biznes sýbektilerin (ShOB) qoldaý: 32 mlrd teńge.
Budan basqa, kepildik berý, sýbsidiialaý jáne saqtandyrý siiaqty janama qoldaý quraldary arqyly 700 mlrd teńgeden astam qarajat bólinetin bolady:
• investitsiialyq jobalar men ShOB jobalary boiynsha kepildikter berý: 150 mlrd teńgeden astam;
• ShOB sýbektilerine sýbsidiialar berý: shamamen 300 mlrd teńge;
• eksporttyq operatsiialardy saqtandyrý: shamamen 300 mlrd teńge.
Bul bastama ekonomikalyq turaqtylyqty nyǵaitýǵa jáne Qazaqstan ekonomikasynyń negizgi sektorlarynda ósýdi yntalandyrýǵa baǵyttalǵan.
