«بايتەرەك» ۇبح» اق ەل ەكونوميكاسىن قولداۋ ماقساتىندا شامامەن 3،5 ترلن تەڭگە بولەدى

جاربول كەنت ۇلى 24 ماۋ. 2024 11:37 3064

ۇكىمەتتىڭ ەكونوميكالىق ءوسۋدى قامتاماسىز ەتۋ جونىندەگى ءىس-قيمىل جوسپارى شەڭبەرىندە «بايتەرەك» ۇلتتىق باسقارۋشى حولدينگى» اق قازاقستان ەكونوميكاسىنا شامامەن 3،5 ترلن تەڭگە سوماسىندا قولداۋ كورسەتۋدى جوسپارلاپ وتىر. بۇل تۋرالى ۇكىمەت وتىرىسىندا ق ر پرەمەر-مينيسترى ولجاس بەكتەنوۆ مالىمدەدى.


«ۇكىمەت «سامۇرىق-قازىنا» جانە «بايتەرەك» حولدينگتەرىنىڭ، ىشكى كاپيتال نارىعىنىڭ رەسۋرستارى مەن قاراجاتىن، ەكونوميكا ءۇشىن باسىم جوبالاردى قارجىلاندىرۋعا تىكەلەي شەتەلدىك ينۆەستيسيالار مەن جەكە كاپيتالدى بەلسەندى تۇردە تارتادى. «بايتەرەك» جەلىسى بويىنشا اعىمداعى جىلى 3 ترلن تەڭگەدەن استام سوماعا جوبالاردى قارجىلاندىرۋ جوسپارلانۋدا»، - دەپ تولىقتىردى ولجاس بەكتەنوۆ.


قولداۋدىڭ نەگىزگى بولىگى تىكەلەي قولداۋ قۇرالدارى ارقىلى كورسەتىلەتىن بولادى، وعان 2،8 ترلن تەڭگە بولىنەدى. بۇل قاراجات كەلەسىدەي بولىنەدى:


• ەكونوميكانىڭ ناقتى سەكتورىنىڭ جوبالارىن قارجىلاندىرۋ: شامامەن 1،4 ترلن تەڭگە؛
• كوكتەمگى ەگىس جانە ەگىن جيناۋ جۇمىستارىن قوسا العاندا، اگروونەركاسىپتىك كەشەن جوبالارىن قارجىلاندىرۋ: 0،5 ترلن تەڭگەدەن استام؛
• تۇرعىن ءۇي بلوگىن قولداۋ: شامامەن 0،4 ترلن تەڭگە؛
• «ناۋرىز» جانە «وتاۋ» يپوتەكالىق باعدارلامالارىن ىسكە اسىرۋ: 0،4 ترلن تەڭگە؛
• ەكسپورتتاۋشىلار مەن شاعىن جانە ورتا بيزنەس سۋبەكتىلەرىن (شوب) قولداۋ: 32 ملرد تەڭگە.
بۇدان باسقا، كەپىلدىك بەرۋ، سۋبسيديالاۋ جانە ساقتاندىرۋ سياقتى جاناما قولداۋ قۇرالدارى ارقىلى 700 ملرد تەڭگەدەن استام قاراجات بولىنەتىن بولادى:
• ينۆەستيسيالىق جوبالار مەن شوب جوبالارى بويىنشا كەپىلدىكتەر بەرۋ: 150 ملرد تەڭگەدەن استام؛
• شوب سۋبەكتىلەرىنە سۋبسيديالار بەرۋ: شامامەن 300 ملرد تەڭگە؛
• ەكسپورتتىق وپەراسيالاردى ساقتاندىرۋ: شامامەن 300 ملرد تەڭگە.


بۇل باستاما ەكونوميكالىق تۇراقتىلىقتى نىعايتۋعا جانە قازاقستان ەكونوميكاسىنىڭ نەگىزگى سەكتورلارىندا ءوسۋدى ىنتالاندىرۋعا باعىتتالعان.


ۇسىنىلعان
سوڭعى جاڭالىقتار