Áielin óltirdi dep aiyptalyp otyrǵan Qýandyq Bishimbaevqa qatysty sot otyrysynda Bishimbaevtyń týysy Baqytjan Baijanov mán-jaidy aitty, - dep habarlaidy Dalanews.kz.
Onyń sózinshe, Bishimbaev qarashaǵa deiin de úiindegi videony óshirýdi suraǵan.
"Qarashaǵa deiin 2-3 ai buryn Bishimbaev Turan dańǵylyndaǵy turǵyn úi keshenindegi beinebaqylaý kameralarynan videony óshirýdi surady.
Bul úide ol Saltanatpen birge turdy. Olardyń arasynda urys-keris bolǵan. Ol kezde de muny kórshileri kórmeýin, sondai-aq, áleýmettik jelige taramaýyn qalady dep oiladym. Ol kezde basqarýshy kompaniianyń ofisine bardym, páter ieleri kooperativiniń tóraǵasy Gúlnurǵa meniń kózimshe videony óshirip tastady", - dedi ol sot otyrysynda.
Baijanov qazir PIK ókili videony óshirgenin moiyndamai otyrǵanyn jetkizdi. Aiyptalýshynyń aitýynsha, bul onyń qyzmetine kedergi keltirýi múmkin eken. Alaida Baijanov bul videony qalpyna keltirýge bolatynyn nemese video óshirilgenin kórýge bolatynyn málimdedi.
Aita keteiik, buǵan deiin Qýandyq Bishimbaevtyń inisi Baqytjan Baijanov sot otyrysynda qaiǵyly oqiǵa bolǵan kúni Saltanat Núkenovany birneshe ret kórgenin málimdedi.
"Saltanattyń bir kózi isip turǵanyn kórdim. Vip-bólmeniń ishiniń astań-kesteńi shyǵyp jatty. Dárethananyń esigi qiraǵanyn kórdim. Tańerteń gastroortalyqqa kelgen kezde Bishimbaev túni boiy shý shyǵaryp, ishimdik iship, Saltanatty uryp tastaǵanyn bilip keldim. Bul týraly gastroortalyqqa keler aldynda habardar boldym. Biraq ol kezde eshteńe túsinbedim. Saltanatqa qaýip tónip turǵanyn, ólim men ómirdiń ortasynda turǵanyn bilmedim. Bul aqtalý emes. Men tek shyn máninde ne bolyp jatqanyn kóre almadym.
Bul meniń kinám jáne men oǵan qatty ókinemin. Eger nazar aýdaryp qarasam múlde basqa jaǵdai bolar edi. Endi amal ne? Men ýaqytynda kómektese almasam da Saltanattyń jaqyndary meni keshire alady dep senemin", - deidi Baijanov.
Ol Saltanat meiramhanaǵa buryn jii kelgenin aitady.
"Óte meiirimdi edi. Meiramhana qyzmetkerleri Saltanat tarapynan eshqandai dórekilik kórgen emes. Ony kez kelgen qyzmetker rastai alady. ...Men 33-temin, qarapaiym otbasynan shyqqanmyn. Áielim, úsh balam bar. Meniń kesirimnen olar da zardap shegip otyr. Olardan da, ata-anamnan da keshirim suraimyn", - deidi Baijanov.
Aita keteiik, Baijanov gastroortalyqta 2022 jyldan beri direktor qyzmetin atqarǵan.
