ايەلىن ءولتىردى دەپ ايىپتالىپ وتىرعان قۋاندىق بيشىمبايەۆقا قاتىستى سوت وتىرىسىندا بيشىمبايەۆتىڭ تۋىسى باقىتجان بايجانوۆ ءمان-جايدى ايتتى، - دەپ حابارلايدى Dalanews.kz.

ونىڭ سوزىنشە، بيشىمبايەۆ قاراشاعا دەيىن دە ۇيىندەگى ۆيدەونى ءوشىرۋدى سۇراعان.

"قاراشاعا دەيىن 2-3 اي بۇرىن بيشىمبايەۆ تۇران داڭعىلىنداعى تۇرعىن ءۇي كەشەنىندەگى بەينەباقىلاۋ كامەرالارىنان ۆيدەونى ءوشىرۋدى سۇرادى.

بۇل ۇيدە ول سالتاناتپەن بىرگە تۇردى. ولاردىڭ اراسىندا ۇرىس-كەرىس بولعان. ول كەزدە دە مۇنى كورشىلەرى كورمەۋىن، سونداي-اق، الەۋمەتتىك جەلىگە تاراماۋىن قالادى دەپ ويلادىم. ول كەزدە باسقارۋشى كومپانيانىڭ وفيسىنە باردىم، پاتەر يەلەرى كووپەراتيۆىنىڭ ءتوراعاسى گۇلنۇرعا مەنىڭ كوزىمشە ۆيدەونى ءوشىرىپ تاستادى"، - دەدى ول سوت وتىرىسىندا. 

بايجانوۆ ءقازىر پيك وكىلى ۆيدەونى وشىرگەنىن مويىنداماي وتىرعانىن جەتكىزدى. ايىپتالۋشىنىڭ ايتۋىنشا، بۇل ونىڭ قىزمەتىنە كەدەرگى كەلتىرۋى مۇمكىن ەكەن. الايدا بايجانوۆ بۇل ۆيدەونى قالپىنا كەلتىرۋگە بولاتىنىن نەمەسە ۆيدەو وشىرىلگەنىن كورۋگە بولاتىنىن مالىمدەدى.

ايتا كەتەيىك، بۇعان دەيىن قۋاندىق بيشىمبايەۆتىڭ ءىنىسى باقىتجان بايجانوۆ سوت وتىرىسىندا قايعىلى وقيعا بولعان كۇنى سالتانات نۇكەنوۆانى بىرنەشە رەت كورگەنىن مالىمدەدى. 

"سالتاناتتىڭ ءبىر كوزى ءىسىپ تۇرعانىن كوردىم. ۆيپ-بولمەنىڭ ءىشىنىڭ استاڭ-كەستەڭى شىعىپ جاتتى. دارەتحانانىڭ ەسىگى قيراعانىن كوردىم. تاڭەرتەڭ گاستروورتالىققا كەلگەن كەزدە بيشىمبايەۆ ءتۇنى بويى شۋ شىعارىپ، ىشىمدىك ءىشىپ، سالتاناتتى ۇرىپ تاستاعانىن ءبىلىپ كەلدىم. بۇل تۋرالى گاستروورتالىققا كەلەر الدىندا حاباردار بولدىم. ءبىراق ول كەزدە ەشتەڭە تۇسىنبەدىم. سالتاناتقا ءقاۋىپ ءتونىپ تۇرعانىن، ءولىم مەن ءومىردىڭ ورتاسىندا تۇرعانىن بىلمەدىم. بۇل اقتالۋ ەمەس. مەن تەك شىن مانىندە نە بولىپ جاتقانىن كورە المادىم. 

بۇل مەنىڭ كىنام جانە مەن وعان قاتتى وكىنەمىن. ەگەر نازار اۋدارىپ قاراسام مۇلدە باسقا جاعداي بولار ەدى. ەندى امال نە؟ مەن ۋاقىتىندا كومەكتەسە الماسام دا سالتاناتتىڭ جاقىندارى مەنى كەشىرە الادى دەپ سەنەمىن"، - دەيدى بايجانوۆ.

ول سالتانات مەيرامحاناعا بۇرىن ءجيى كەلگەنىن ايتادى. 

"وتە مەيىرىمدى ەدى. مەيرامحانا قىزمەتكەرلەرى سالتانات تاراپىنان ەشقانداي دورەكىلىك كورگەن ەمەس. ونى كەز كەلگەن قىزمەتكەر راستاي الادى. ...مەن 33-تەمىن، قاراپايىم وتباسىنان شىققانمىن. ايەلىم، ءۇش بالام بار. مەنىڭ كەسىرىمنەن ولار دا زارداپ شەگىپ وتىر. ولاردان دا، اتا-انامنان دا كەشىرىم سۇرايمىن"، - دەيدى بايجانوۆ.

ايتا كەتەيىك، بايجانوۆ گاستروورتالىقتا 2022 جىلدان بەرى ديرەكتور قىزمەتىن اتقارعان.