Ońtústik Qazaqstan oblysynyń Báıdibek aýdanyndaǵy úsh eldi mekenge taza aýyz sý keldi. Jyldar boıyna sheshimin tappaǵan ózekti máselege respýblıkalyq jáne oblystyq búdjetten 525,2 mıllıon teńgege jýyq qarajat bólinip, taý eteginen magıstraldy sýaqqy qurylysy salyndy. Osynyń nátıjesinde Terekti, Qaratas, Boraldaı eldi mekendegi 1684 turǵyn taza aýyz sýǵa qol jetkizdi.

Magıstraldy sýaqqynyń iske qosylý sharasyna aýdan basshysy B.Tanagózov qatysyp, aýyl turǵyndarynyń qýanyshymen bólisti. Sondaı-aq ákim aldaǵy ýaqytta júzege asyrylatyn jobalarǵa toqtalyp, saltanatty túrde aýyz sý qubyrynyń tetigin iske qosty.

Bólingen qarjy esebinen magıstraldy sýaqqydan eldi mekenge deıingi aralyqta 26 shaqyrym sý qubyry, al aýyldyń barlyq kóshelerine 31 shaqyrymdyq sý júıesi tartyldy. Bul nysandardyń qurylys jumystaryn «NURAI QURYLYS JOLY» JSHS-gi men «SEVER-ÚG- ÝNIVERSAL» JSHS-gi júrgizdi.

Óz kezinde aýyldyń tóbe bıi Seıitkárim Nurjanov turǵyndar atynan jergilikti bılikke alǵysyn aıtyp, bul osynda turatyn 267 otbasy úshin orasan zor qýanyshty oqıǵa ekenin jetkizdi.

Jalpy aýdan kólemindegi 52 eldi mekenniń búgingi tańǵa 34-i qubyrly aýyzsýmen qamtylǵan. Iaǵnı turǵyndardyń  83,4  paıyzy taza aýyzsýǵa qol jetkizgen. 2018 jyly aýdandaǵy turǵyndardy taza aýyzsýmen qamtý maqsatynda 9 eldi mekende aýyz sý qurylysy júrgizilse,   aldaǵy 2020-2021 jyldary aýdandy tolyq sapaly aýyz sýmen qamtý jumystaryn aıaqtaý josparlanýda.

 

OQO ákiminiń baspasóz qyzmeti