Dúbirli dýmanda sóz alǵan «Nur Otan» partiiasy Tóraǵasynyń Birinshi orynbasary Baýyrjan Baibek el Táýelsizdiginiń mán-mańyzy men ult mádenietin órkendetýdegi yqpalyna keńinen toqtaldy.
– Biz qysqa ýaqytta ǵasyrǵa tatityn joldy júrip óttik. Tuńǵysh Prezident – Elbasy Nursultan Ábishuly Nazarbaevtyń basshylyǵymen qol jetken tabystarymyz orasan. Eń bastysy, Táýelsizdigimizdiń tuǵyryn nyǵaityp, eldigimizdi ornyqty ettik. Memlekettilikti baiandy eter aýqymdy ister jolǵa qoiyldy.
Elbasynyń bul aýqymdy jobasy keiinnen «Rýhani jańǵyrý», «Uly Dalanyń jeti qyry» baǵdarlamalaryna ulasqanyn Ózderińiz jaqsy bilesizder. Jaqynda Elbasymyz «Eldiktiń 7 tuǵyry» atty qaǵidattar jinaǵyn jariialady. 30 jyldyq damýdy qorytyndylaǵan, keler urpaqqa amanat retinde aitylǵan bul Jeti tuǵyr – «Máńgilik El» bolýǵa bastaityn naqty qaǵidattar, – dedi Baýyrjan Baibek.
Sondai-aq ol «Nur Otan» partiiasynyń Saiasi tuǵyrnamasynda «qazaq tilin, mádeniet pen dástúrdi damytý – strategiialyq basymdyǵy» ekendigi naqty kórsetilgenin alǵa tartty. Sonyń aiasynda partiia ulttyq mádenietke, ónerge, onyń ishinde aitysqa basymdyq berip, udaiy qoldaý kórsetip keledi. Ulttyq qundylyqtar baǵytyndaǵy is-sharalar «Ulttyq mura» partiialyq jobasy aiasynda toptastyrylyp, júielendirilgen. Partiianyń sailaýaldy baǵdarlamasy aiasynda biyldyń ózinde 200-ge jýyq mádeniet nysanyna jóndeý jumystary júrgizildi. Jyl basynan beri «Nur Otan»-nyń qoldaýymen elimizde 49 aqyndar aitysy ótti.
Táýelsizdikke qol jetkenge deiin jáne el egemendigin alǵan alǵashqy onjyldyqtaǵy qiyn kúnderdi aǵa býyn jaqsy biletinine toqtalǵan partiia Tóraǵasynyń Birinshi orynbasary, eń basty qundylyǵymyz – Táýelsizdikti nyǵaitý úshin eldiń birligi men turaqtylyq kerek ekenin basa aitty.
Mádeniet jáne sport ministri Aqtoty Raiymqulova ministrlik tarapynan ulttyq ónerdi qoldaý baǵytynda atqarylyp jatqan irgeli ister men bolashaq jobalary týraly aitty.
– Kieli merekemizdiń qarsańynda elordamyzda eki kún boiy ótkiziletin asyl qazynamyz, aqyndardyń jyr dodasyna qosh keldińizder! Ǵasyrdan ǵasyrǵa jalǵasyp kele jatqan halqymyzdyń kieli aitys ónerin qurmettep, jańǵyrtý, ony keiingi jas urpaqtyń sanasyna sińirý – bizdiń mindetimiz.
Halyqtyń rýhani qazynasyna ainalǵan búgingi jyr dodasy – aqyndardyń talantyn shyńdaityn úlken óner jarysy. Biylǵy Táýelsizdigimizdiń 30 jyldyǵy, jyr alaby Jambyl atamyzdyń 175 jyldyǵy siiaqty aitýly merekeler aqiyq aqyndarymyzdyń shyǵarmalaryna shabyt qosyp, salmaqty da, oily sózdermen óriledi degen senimdemin. Búginde mádeniet salasynda da tól ónerimizdi, ulttyq mádenietimizdi saqtap, keiingi urpaqqa miras etý baǵytynda úlken jumys atqarylyp jatyr, – dedi ministr.
Óz kezeginde, biyl mereili jetpis jasqa tolyp, aitystyń abyzy atanǵan Júrsin Erman el Táýelsizdiginiń 30 jyldyǵyna orai uiymdastyrylyp otyrǵan bul alamannyń burynǵy aitystan jóni bólek ekenin jetkizdi.
– Kók týymyz tóbemizde jelbirep turǵaly 30 jyl boldy! Bul 30 jyl – tarih úshin qasqaǵym sát bolǵanymen, Qazaqstan úshin ǵasyrǵa bergisiz ýaqyt. 30 jyl buryn kartadan áreń tabylatyn Qazaqstan, qazir álem sanasatyn, eldiń bári biletin, osynda kelip kelisim tabatyn, halyqaralyq airyqsha sharalardyń astanasyna ainalǵan ýaqyt boldy. Bul jyldardyń ishinde Qazaqstan ózinin táýelsizdigin ǵana jariialap qoiǵan joq, rýhani, áleýmettik, ekonomikalyq derbestigin de alyp, qaryshtap damyp kele jatyr. Ony kórgisi kelgen adam kóredi. Qazir Qazaqstannyn halyqaralyq abyroiyna eshkim kúmán keltire almaidy. Osy 30 jyldyqtyń qarsańynda elimizdiń ár jerinde úlken-úlken sharalar ótip jatyr. Solardyń biri – búgingi «Táýelsizdik – qasterlim, qasietim» dep atalatyn «Altyn dombyra» aitysy. Bul aitysqa biyl óńirlerde ótken aitystardyń jeńimpazdaryn jinadyq. Bári de jyr alamandarynda eldiń rýhyn kóterip, basyn biriktirip, jaqsylyqty jyrlap júrgen naǵyz shashasyna shań juqpaǵan júirikter, – degen Júrsin Erman alamanǵa túsetin aqyndardy jeke-jeke tanystyrdy.
El Táýelsizdiginiń 30 jyldyǵyna orai uiymdastyrylyp otyrǵan alaman aitysta elimizdiń túkpir-túkpirinen kelgen 22 aitysker aqyn ózara saiysqa túsýde. Olardyń arasynda halyqaralyq jáne respýblikalyq aitystardyń jeńimpazdary, «Altyn dombyra» iegerleri Bekarys Shoibekov, Rústem Qaiyrtai, Aspanbek Shuǵataev, Jansaia Mýsina, sonymen qatar aitys aqtańgerleri Erkebulan Qainazarov, Serik Qýanǵan, Shuǵaiyp Sezimhan jáne t.b. bar. Dodada top jaryp, «júzden júirik, myńnan tulpar shyqqan» jeńimpazdar erteńgi aqtyq saiysta anyqtalatyn bolady.
Atalǵan dúbirli dodanyń ádilqazylar alqasyna kórnekti óner qairatkeri, Qazaqstan jáne KSRO Halyq artisi, Memlekettik syilyqtyń iegeri – Asanáli Áshimov tóraǵalyq etedi. Sondai-aq qazylar quramynda aitys aqyny, Qazaqstannyń halyq aqyny Ásiia Berkenova, úsh dúrkin «Altyn dombyra» iegeri Muhtar Niiazov, aitysker aqyn, Qazaqstannyń eńbek sińirgen qairatkeri Amanjol Áltaev jáne ózge de óner, qoǵam qairatkerleri bar.
