بايبەك ۇلتتىق قۇندىلىقتاردى ۇلىقتايتىن «ۇلتتىق مۇرا» پارتيالىق جوباسى تۋرالى ايتتى

Dalanews 11 جەلت. 2021 12:48 487

ەلوردادا «Nur Otan» پارتياسىنىڭ قولداۋىمەن ق ر مادەنيەت جانە سپورت مينيسترلىگى مەن نۇر-سۇلتان قالاسى اكىمدىگىنىڭ ۇيىمداستىرۋىمەن «تاۋەلسىزدىك – قاسيەتىم، قاستەرلىم!» اتتى «التىن دومبىرا» رەسپۋبليكالىق اقىندار ايتىسى باستالدى. ەكى كۇنگە سوزىلاتىن الامان ەل تاۋەلسىزدىگىنىڭ 30 جىلدىعىنا ورايلاستىرىلىپ وتىر، – دەپ حابارلايدى Dalanews.kz.

ءدۇبىرلى دۋماندا ءسوز العان «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ەل تاۋەلسىزدىگىنىڭ ءمان-ماڭىزى مەن ۇلت مادەنيەتىن وركەندەتۋدەگى ىقپالىنا كەڭىنەن توقتالدى.

– ءبىز قىسقا ۋاقىتتا عاسىرعا تاتيتىن جولدى ءجۇرىپ وتتىك. تۇڭعىش پرەزيدەنت – ەلباسى نۇرسۇلتان ءابىش ۇلى نازاربايەۆتىڭ باسشىلىعىمەن قول جەتكەن تابىستارىمىز وراسان. ەڭ باستىسى، تاۋەلسىزدىگىمىزدىڭ تۇعىرىن نىعايتىپ، ەلدىگىمىزدى ورنىقتى ەتتىك. مەملەكەتتىلىكتى باياندى ەتەر اۋقىمدى ىستەر جولعا قويىلدى.

ايتىستىڭ ۇلتتىق ونەر رەتىندە ساقتالۋى، رۋحانياتىمىزعا ەركىن جول اشىلۋى دا – تاۋەلسىزدىكتىڭ ارقاسى. ەلباسى نۇرسۇلتان ءابىش ۇلى ۋاقىتىندا «مادەنيەت – ۇلتتىڭ بەت-بەينەسى، رۋحاني بولمىسى، اقىل-ويى، پاراساتى» دەپ اتاپ كورسەتىپ، وركەنيەتتى ۇلت ءوزىنىڭ ءتول مادەنيەتى ارقىلى عانا باسقا ەلدەرگە تانىلاتىنىن ايتتى. تاۋەلسىزدىك العان ساتتەن باستاپ ۇلت مادەنيەتىنە ۇدايى قامقورلىق تانىتىپ، مەملەكەتتىك قولداۋ كورسەتتى. ارنايى «مادەني مۇرا» باعدارلاماسىن ۇسىنىپ، ونىڭ اياسىندا قانشاما قۇندى جادىگەرلەر، جازبا دەرەكتەر جيناقتالىپ، رۋحاني قازىنامىزدى بايىتتى، كوپتەگەن مادەني وشاقتار جاڭعىرتىلدى.

ەلباسىنىڭ بۇل اۋقىمدى جوباسى كەيىننەن «رۋحاني جاڭعىرۋ»، «ۇلى دالانىڭ جەتى قىرى» باعدارلامالارىنا ۇلاسقانىن وزدەرىڭىز جاقسى بىلەسىزدەر. جاقىندا ەلباسىمىز «ەلدىكتىڭ 7 تۇعىرى» اتتى قاعيداتتار جيناعىن جاريالادى. 30 جىلدىق دامۋدى قورىتىندىلاعان، كەلەر ۇرپاققا امانات رەتىندە ايتىلعان بۇل جەتى تۇعىر – «ماڭگىلىك ەل» بولۋعا باستايتىن ناقتى قاعيداتتار، – دەدى باۋىرجان بايبەك.


سونداي-اق ول «Nur Otan» پارتياسىنىڭ ساياسي تۇعىرناماسىندا «قازاق ءتىلىن، مادەنيەت پەن ءداستۇردى دامىتۋ – ستراتەگيالىق باسىمدىعى» ەكەندىگى ناقتى كورسەتىلگەنىن العا تارتتى. سونىڭ اياسىندا پارتيا ۇلتتىق مادەنيەتكە، ونەرگە، ونىڭ ىشىندە ايتىسقا باسىمدىق بەرىپ، ۇدايى قولداۋ كورسەتىپ كەلەدى. ۇلتتىق قۇندىلىقتار باعىتىنداعى ءىس-شارالار «ۇلتتىق مۇرا» پارتيالىق جوباسى اياسىندا توپتاستىرىلىپ، جۇيەلەندىرىلگەن. پارتيانىڭ سايلاۋالدى باعدارلاماسى اياسىندا بيىلدىڭ وزىندە 200-گە جۋىق مادەنيەت نىسانىنا جوندەۋ جۇمىستارى جۇرگىزىلدى. جىل باسىنان بەرى «Nur Otan»-نىڭ قولداۋىمەن ەلىمىزدە 49 اقىندار ايتىسى ءوتتى.

تاۋەلسىزدىككە قول جەتكەنگە دەيىن جانە ەل ەگەمەندىگىن العان العاشقى ونجىلدىقتاعى قيىن كۇندەردى اعا بۋىن جاقسى بىلەتىنىنە توقتالعان پارتيا ءتوراعاسىنىڭ ءبىرىنشى ورىنباسارى، ەڭ باستى قۇندىلىعىمىز – تاۋەلسىزدىكتى نىعايتۋ ءۇشىن ەلدىڭ بىرلىگى مەن تۇراقتىلىق كەرەك ەكەنىن باسا ايتتى.

مادەنيەت جانە سپورت ءمينيسترى اقتوتى رايىمقۇلوۆا مينيسترلىك تاراپىنان ۇلتتىق ونەردى قولداۋ باعىتىندا اتقارىلىپ جاتقان ىرگەلى ىستەر مەن بولاشاق جوبالارى تۋرالى ايتتى.

– كيەلى مەرەكەمىزدىڭ قارساڭىندا ەلوردامىزدا ەكى كۇن بويى وتكىزىلەتىن اسىل قازىنامىز، اقىنداردىڭ جىر دوداسىنا قوش كەلدىڭىزدەر! عاسىردان عاسىرعا جالعاسىپ كەلە جاتقان حالقىمىزدىڭ كيەلى ايتىس ونەرىن قۇرمەتتەپ، جاڭعىرتۋ، ونى كەيىنگى جاس ۇرپاقتىڭ ساناسىنا ءسىڭىرۋ – ءبىزدىڭ مىندەتىمىز.

حالىقتىڭ رۋحاني قازىناسىنا اينالعان بۇگىنگى جىر دوداسى – اقىنداردىڭ تالانتىن شىڭدايتىن ۇلكەن ونەر جارىسى. بيىلعى تاۋەلسىزدىگىمىزدىڭ 30 جىلدىعى، جىر الابى جامبىل اتامىزدىڭ 175 جىلدىعى سياقتى ايتۋلى مەرەكەلەر اقيىق اقىندارىمىزدىڭ شىعارمالارىنا شابىت قوسىپ، سالماقتى دا، ويلى سوزدەرمەن ورىلەدى دەگەن سەنىمدەمىن. بۇگىندە مادەنيەت سالاسىندا دا ءتول ونەرىمىزدى، ۇلتتىق مادەنيەتىمىزدى ساقتاپ، كەيىنگى ۇرپاققا ميراس ەتۋ باعىتىندا ۇلكەن جۇمىس اتقارىلىپ جاتىر، – دەدى مينيستر.


ءوز كەزەگىندە، بيىل مەرەيلى جەتپىس جاسقا تولىپ، ايتىستىڭ ابىزى اتانعان ءجۇرسىن ەرمان ەل تاۋەلسىزدىگىنىڭ 30 جىلدىعىنا وراي ۇيىمداستىرىلىپ وتىرعان بۇل الاماننىڭ بۇرىنعى ايتىستان ءجونى بولەك ەكەنىن جەتكىزدى.

– كوك تۋىمىز توبەمىزدە جەلبىرەپ تۇرعالى 30 جىل بولدى! بۇل 30 جىل – تاريح ءۇشىن قاسقاعىم ءسات بولعانىمەن، قازاقستان ءۇشىن عاسىرعا بەرگىسىز ۋاقىت. 30 جىل   بۇرىن كارتادان ارەڭ تابىلاتىن قازاقستان، ءقازىر الەم ساناساتىن، ەلدىڭ ءبارى بىلەتىن، وسىندا كەلىپ كەلىسىم تاباتىن، حالىقارالىق ايرىقشا شارالاردىڭ استاناسىنا اينالعان ۋاقىت بولدى. بۇل جىلداردىڭ ىشىندە قازاقستان ءوزىنىن تاۋەلسىزدىگىن عانا جاريالاپ قويعان جوق، رۋحاني، الەۋمەتتىك، ەكونوميكالىق دەربەستىگىن دە الىپ، قارىشتاپ دامىپ كەلە جاتىر. ونى كورگىسى كەلگەن ادام كورەدى. ءقازىر قازاقستاننىن حالىقارالىق ابىرويىنا ەشكىم كۇمان كەلتىرە المايدى. وسى 30 جىلدىقتىڭ قارساڭىندا ەلىمىزدىڭ ءار جەرىندە ۇلكەن-ۇلكەن شارالار ءوتىپ جاتىر.  سولاردىڭ ءبىرى – بۇگىنگى «تاۋەلسىزدىك – قاستەرلىم، قاسيەتىم» دەپ اتالاتىن «التىن دومبىرا» ايتىسى. بۇل ايتىسقا بيىل وڭىرلەردە وتكەن ايتىستاردىڭ جەڭىمپازدارىن جينادىق. ءبارى دە جىر الاماندارىندا ەلدىڭ رۋحىن كوتەرىپ، باسىن بىرىكتىرىپ، جاقسىلىقتى جىرلاپ جۇرگەن ناعىز شاشاسىنا شاڭ جۇقپاعان جۇيرىكتەر، – دەگەن ءجۇرسىن ەرمان الامانعا تۇسەتىن اقىنداردى جەكە-جەكە تانىستىردى.



ەل تاۋەلسىزدىگىنىڭ 30 جىلدىعىنا وراي ۇيىمداستىرىلىپ وتىرعان الامان ايتىستا ەلىمىزدىڭ تۇكپىر-تۇكپىرىنەن كەلگەن 22 ايتىسكەر اقىن ءوزارا سايىسقا تۇسۋدە. ولاردىڭ اراسىندا حالىقارالىق جانە رەسپۋبليكالىق ايتىستاردىڭ جەڭىمپازدارى، «التىن دومبىرا» يەگەرلەرى بەكارىس شويبەكوۆ، رۇستەم قايىرتاي، اسپانبەك شۇعاتايەۆ، جانسايا مۋسينا، سونىمەن قاتار ايتىس اقتاڭگەرلەرى ەركەبۇلان قاينازاروۆ، سەرىك قۋانعان، شۇعايىپ سەزىمحان جانە ت.ب. بار. دودادا توپ جارىپ، «جۇزدەن جۇيرىك، مىڭنان تۇلپار شىققان» جەڭىمپازدار ەرتەڭگى اقتىق سايىستا انىقتالاتىن بولادى.


اتالعان ءدۇبىرلى دودانىڭ ءادىلقازىلار القاسىنا كورنەكتى ونەر قايراتكەرى، قازاقستان جانە كسرو حالىق ءارتيسى، مەملەكەتتىك سىيلىقتىڭ يەگەرى – ءاسانالى ءاشىموۆ ءتوراعالىق ەتەدى. سونداي-اق قازىلار قۇرامىندا ايتىس اقىنى، قازاقستاننىڭ حالىق اقىنى ءاسيا بەركەنوۆا، ءۇش دۇركىن «التىن دومبىرا» يەگەرى مۇحتار نيازوۆ، ايتىسكەر اقىن، قازاقستاننىڭ ەڭبەك سىڭىرگەن قايراتكەرى امانجول التايەۆ جانە وزگە دە ونەر، قوعام قايراتكەرلەرى بار.

ۇسىنىلعان
سوڭعى جاڭالىقتار