Almatynyń eks-ákimi Baýyrjan Baıbektiń otbasy uıymdasqan qylmystyq top (UQT) jetekshisi Eldos Qospaevtyń zańsyz shemalaryna belsendi túrde qatysqan, dep habarlaıdy Dalanews.kz Qaztag agenttigine silteme jasap.
«Qospaev E. jáne onyń uıymdasqan tobynyń músheleri 2019 jyldyń 8 sáýiri men 2020 jyldyń 23 jeltoqsany aralyǵynda “AV-Construction” JSHS-niń múlkin ıemdenip, senip tapsyrylǵan jyljymaıtyn múlik nysandaryn úshinshi tulǵalarǵa ózindik qunynan tómen baǵamen satý arqyly kásiporyn men onyń zańdy menshik ıelerine zalal keltirgen. Atap aıtqanda, D. Ábijanov, T. Tanashev jáne R. Babaev Qospaev E. jáne ózge tulǵalarmen kelisip, paıdalanýǵa berilgen jáne qurylysy júrip jatqan nysandardy Almaty qalasynyń sol kezdegi ákimi Baıbektiń ákesi — Qydyrǵalı Baıbektiń paıdasyna tómen baǵamen satýǵa sheshim qabyldaǵan», — delingen Qospaev UQT-syna qatysty sot úkiminde (qujat kóshirmesi KazTAG agenttiginiń qolynda bar).
Ári qaraı Ábijanov, Tanashev jáne Babaev Qospaevpen jáne Baıbektiń ákesiniń múddesin kózdegen ózge tulǵamen kelisip, úsh jyljymaıtyn múlik nysanynyń baǵasyn anyqtaǵan. Bul nysandar Baıbektiń týysy — Qydyrǵalı Baıbekke naryqtan áldeqaıda tómen baǵamen, ıaǵnı bir sharshy metrine 230 myńnan 425 myń teńgege deıingi baǵada satylǵan.
2019 jyldyń 8 sáýirinde Qospaev E. Almaty qalasy, Ospanov kóshesi 22a mekenjaıynda ornalasqan “AV-Construction” JSHS keńsesinde, sondaı-aq sol jyldyń qańtarynan bastap Ál-Farabı dańǵyly, 128/4 (qazirgi Qapparov kóshesi, 74-úı) mekenjaıynda Babaev R.-ǵa Qapparov kóshesi, 116/9 mekenjaıyndaǵy №14 páterdi Qydyrǵalı Baıbekke ózindik qunynan tómen baǵada — 43 586 000 teńgege satý týraly tapsyrma bergen. Babaev, Qospaevtyń qylmystyq tapsyrmasyn oryndap, sol kúni páter úshin tólem qabyldanǵan soń, “AV-Construction” JSHS atynan №116/9-14 kelisimshartyn jasap, aýdany 114,7 sharshy metr bolatyn páterdi satýǵa qol qoıǵan.
2020 jyldyń 23 jeltoqsanynda Qospaev E. “AV-Construction” keńsesinde taǵy da Babaevqa Qapparov kóshesi, 116/24 mekenjaıynda ornalasqan eki komersıalyq nysandy Baıbektiń ákesine ózindik qunynan tómen baǵada — 50 206 027 jáne 40 464 621 teńgege satý týraly nusqaý bergen. Sol kúni, tólem jasalǵannan keıin, Babaev Qydyrǵalı Baıbektiń múddesi úshin áreket etip, “AV-Construction” JSHS atynan eki kelisimshartqa qol qoıǵan.
