Astanada Almatynyń burynǵy ákimi Baýyrjan Baibekke tiesili qymbat qolsaǵattardyń urlanýyna qatysty qylmystyq is tergelip jatyr, dep habarlaidy dalanews.kz.
Jýrnalist Mihail Kozachkovtyń málimetinshe, urlyqqa eks-sheneýniktiń kómekshisiniń kómekshisi bolyp jumys istegen 31 jastaǵy Nurbolat esimdi azamattyń qatysy bolýy múmkin. Onyń túrli tapsyrma oryndap júrgendikten, úidegi baǵaly zattardyń qaida saqtalatynyn bilgeni aitylady.
Jýrnalistiń dereginshe, Baibek otbasymen birge shetelge ketken kezde kúdikti qyzmettik kólikten qosalqy kiltti alyp, úige kirgen.
Ol baǵaly saǵattardy alyp ketip qana qoimai, olardyń ornyna kóshirmelerin qaldyrǵan degen aqparat bar.
Kozachkov urlanǵan saǵattardyń arasynda Breguet, Blancpain, Hublot, Jaeger-LeCoultre jáne A. Lange & Söhne brendteriniń ónimderi bolǵanyn jazdy. Onyń baǵalaýynsha, kollektsiianyń jalpy quny shamamen 90 mln teńgege jetýi múmkin.
Úi ieleri shetelden oralǵannan keiin saǵattardyń aýystyrylǵanyn baiqap, politsiiaǵa júgingen.
Astana qalalyq politsiia departamenti urlyq deregi boiynsha kúdiktiniń ustalǵanyn rastady.
"Saǵat urlaý faktisi boiynsha politsiia 31 jastaǵy kúdiktini ustady. Qylmystyq is qozǵaldy. Tergeý amaldary jalǵasýda", – dep habarlady elorda politsiiasy.
Atalǵan brendterdiń barlyǵy premiým sanattaǵy saǵattar shyǵarady. Máselen, Hublot Classic Fusion Black Magic modeliniń baǵasy shamamen 10,7 myń dollar bolsa, Blancpain Fifty Fathoms Bathyscaphe 2026 úlgisi 18,3 myń dollarǵa baǵalanady.
Breguet, Jaeger-LeCoultre jáne A. Lange & Söhne markalarynyń jekelegen modelderiniń quny ondaǵan myń dollarǵa deiin jetýi múmkin.
Degenmen urlanǵan saǵattardyń naqty quny olardyń modelderi men jaǵdaiy tolyq anyqtalǵannan keiin belgili bolady. Qazirgi ýaqytta is boiynsha tergeý jalǵasyp jatyr.
