Qarjylyq monitoring agenttigi (QMA) Almatynyń eks-ákimi Baýyrjan Baibek pen onyń týystaryna qatysty qylmystyq is tirkelmegenin rastady. Bul týraly agenttik tóraǵasynyń orynbasary Jeńis Elemesov málimdedi, dep habarlaidy Dalanews.kz.
Jýrnalist Baibekter otbasynyń qarjylyq aktivteri men olardyń Qospaev tobyna qatysy jaily suraq qoidy.
– Baibekke qatysty bizde ne ákesine, ne ulyna tirkelgen eshqandai qylmystyq is joq. Qospaevqa qatysty is boiynsha úkim shyqqan. Sonymen qatar, jeke óndiriske bólingen qylmystyq is bar. Ol boiynsha keibir tulǵalardyń áreketine quqyqtyq baǵa berilýi tiis. Bul iske qurylys salasynda belgili bir sheshimder qabyldaǵan laýazymdy tulǵalar men qylmystyq topqa kómektesip, aktivterdi jasyrýǵa atsalysqan belgisiz adamdar da kiredi, – dedi Elemesov.
2018 jyldan 2022 jylǵa deiin Qospaevtyń uiymdasqan qylmystyq toby AV-Construction kompaniiasyn baqylaýyna alyp, Esentai City turǵyn úi keshenindegi 133 jyljymaityn múlikti – páter men kommertsiialyq nysandardy ózderine, týystaryna jáne bailanysy bar adamdarǵa tómendetilgen baǵamen satyp jibergen. Bul áreket kompaniiaǵa 4,6 mlrd teńge kóleminde zalal keltirgen.
Atalǵan jyljymaityn múlikterge ie bolǵandar arasynda Nazarbaevtar áýletiniń músheleri men Almatynyń burynǵy ákimi Baýyrjan Baibektiń ákesi de bar ekeni habarlandy.
