قارجىلىق مونيتورينگ اگەنتتىگى (قما) الماتىنىڭ ەكس-اكىمى باۋىرجان بايبەك پەن ونىڭ تۋىستارىنا قاتىستى قىلمىستىق ءىس تىركەلمەگەنىن راستادى. بۇل تۋرالى اگەنتتىك ءتوراعاسىنىڭ ورىنباسارى جەڭىس ەلەمەسوۆ مالىمدەدى، دەپ حابارلايدى Dalanews.kz.
جۋرناليست بايبەكتەر وتباسىنىڭ قارجىلىق اكتيۆتەرى مەن ولاردىڭ قوسپايەۆ توبىنا قاتىسى جايلى سۇراق قويدى.
– بايبەككە قاتىستى بىزدە نە اكەسىنە، نە ۇلىنا تىركەلگەن ەشقانداي قىلمىستىق ءىس جوق. قوسپايەۆقا قاتىستى ءىس بويىنشا ۇكىم شىققان. سونىمەن قاتار، جەكە وندىرىسكە بولىنگەن قىلمىستىق ءىس بار. ول بويىنشا كەيبىر تۇلعالاردىڭ ارەكەتىنە قۇقىقتىق باعا بەرىلۋى ءتيىس. بۇل ىسكە قۇرىلىس سالاسىندا بەلگىلى ءبىر شەشىمدەر قابىلداعان لاۋازىمدى تۇلعالار مەن قىلمىستىق توپقا كومەكتەسىپ، اكتيۆتەردى جاسىرۋعا اتسالىسقان بەلگىسىز ادامدار دا كىرەدى، – دەدى ەلەمەسوۆ.
2018 جىلدان 2022 جىلعا دەيىن قوسپايەۆتىڭ ۇيىمداسقان قىلمىستىق توبى AV-Construction كومپانياسىن باقىلاۋىنا الىپ، Esentai City تۇرعىن ءۇي كەشەنىندەگى 133 جىلجىمايتىن مۇلىكتى – پاتەر مەن كوممەرسيالىق نىسانداردى وزدەرىنە، تۋىستارىنا جانە بايلانىسى بار ادامدارعا تومەندەتىلگەن باعامەن ساتىپ جىبەرگەن. بۇل ارەكەت كومپانياعا 4،6 ملرد تەڭگە كولەمىندە زالال كەلتىرگەن.
اتالعان جىلجىمايتىن مۇلىكتەرگە يە بولعاندار اراسىندا نازاربايەۆتار اۋلەتىنىڭ مۇشەلەرى مەن الماتىنىڭ بۇرىنعى اكىمى باۋىرجان بايبەكتىڭ اكەسى دە بار ەكەنى حابارلاندى.
