Búginde «Nur Otan» partiiasy Tóraǵasynyń áleýmettik jeliden paraqsha ashýy tańsyq dúnie emes. Meniń aýyldaǵy sheshem sońǵy tórt-bes jylda áleýmettik jelige tirkelip, elimizdegi sońǵy jańalyqtardy qalada júrgen bizden buryn bilip otyratyn bolǵan.
Buǵan deiin de «Nur Otan» partiiasyn basqaryp, Almaty qalasy ákimi qyzmetin atqarǵan Baýyrjan Baibektiń Facebook-ke endi tirkelip jatqanyn alǵashqyda sene almadyq. Biraq, ata-balalarymyz «eshten kesh jaqsy» degen ǵoi.
Óitkeni qazir halyq kókeide júrgen máselelerin osy áleýmettik jelide talqylaidy. Bizdińshe, eldiń kúiin kúitteidi degen azamattardyń bári áleýmettik jeliniń tórinde otyrýy tiis.
Qazaqstan biligi «Tsifrly Qazaqstan» baǵdarlamasyn qolǵa alyp júzege asyryp jatqanyna biraz jyldyń júzi boldy. Al shendiler bolsa áleýmettik jelige endi tirkelýde. Qandai paradoks deseńizshi.
Facebook-tiń baiyrǵy qoldanýshysy retinde qatarymyzǵa qosylyp, sý jańa paraqshanyń iesi atanyp jatqan Baýyrjan Baibek myrzaǵa bir keńesimdi aita ketýdi jón sanap otyrmyn.
Qurmetti Baýyrjan myrza, aldaǵy ýaqytta «Nur Otan» partiiasynyń tizimimen Parlamentke ótken depýtattardy bárin Facebook áleýmettik jelisine tirketip, alys aýyldaǵy jaǵdaidy meniń anam siiaqty qarapaiym adamdardyń paraqshasynan baqylaýlaryńyzǵa bolady. Osyndai jańa tásilge kóship, depýtattardyń el aralaýǵa ketetin milliondaǵan shyǵynyn únemdeýge bolady.
Soynmen qatar nurotandyq depýtattardyń Facebook-te tiklei efirge shyǵaryp, halyqpen etene bailanys ornatýyn talap etińiz.
Sol kezde «Nur Otan» partiiasy halyqtyq saiasi uiymǵa ainalady. Ózińizde baiqaǵan shyǵarsyz Facebook halyqpen bailanys ornatýda taptyrmas qural.
Nurlan JUMAHAN
