Otyrar aýdanyndaǵy Sháýildir aýylynyń turǵyndarymen kezdesý kezinde Keńes zamanynda salynǵan úılerdiń ınjenerlik ınfraqurylymnyń tozyǵy jetkeni jaıly aıtyldy.
«Elbasynyń bastamasymen qolǵa alynǵan «Aýyl – El besigi» jobasynyń aıasynda búginde elimizdiń shalǵaı aýdandarynyń túıitkildi máselelerin sheshý boıynsha partıa júıeli sharalar ázirleýde. Otyrar aýdanyndaǵy Sháýildir aýylynyń turǵyndarymen kezdestim. Munda 300-den astam otbasy 70-80 jyldary salynǵan úılerdegi ınjenerlik ınfraqurylymnyń tozýy saldarynan jylý berý júıesiniń mardymsyz jumysyna baılanysty «Nur Otan» partıasyna shaǵymdanǵan», – dedi «Nur Otan» partıasy Tóraǵasynyń Birinshi orynbasary Baýyrjan Baıbek.
Túrkistan oblysynyń ákimi Ómirzaq Estaıuly uzaq jyldardan beri qordalanyp kelgen máseleniń jaqyn arada sheshiletinin aıtty. Jergilikti búdjetti naqtylaý kezinde jylý júıelerin salý úshin 700 mln. teńgeden astam qarjy bólinbek. Negizgi qazandyqtyń qurylysyna qarajat qaralǵan. Aýyl turǵyndary kótergen máseleni sheshý «Nur Otan» partıasynyń baqylaýyna alyndy.
Jumys sapary barysynda Baýyrjan Baıbek túrkistandyq zıaly qaýym ókilderimen kezdesti. Basqosý barysynda ál-Farabı jáne Abaı syndy oıshyldarymyzdyń mereıtoılaryn taǵlymdy deńgeıde ótkizý jaıy qozǵaldy.
Baýyrjan Baıbek óńirge issaparyn Túrkistan qalasynda jalǵastyrdy. Jetekshi partıa Tóraǵasynyń Birinshi orynbasary «Jastar resýrstyq ortalyǵynda» túrkistandyq qoǵam belsendileri men jastarmen erkin formatta kezdesip, pikir almasty. Jıynda azamattyq qoǵamdy damytý men jastar saıasaty jáne bıylǵy eriktiler jylyn júzege asyrý jaıly máseleler aıtyldy.
Sondaı-aq, Baýyrjan Qadyrǵalıuly Q.A. Iasaýı atyndaǵy Halyqaralyq qazaq-túrik ýnıversıteti mádenıet saraıynda «Nur Otan» partıasy Túrkistan oblystyq fılıaly Tóraǵasynyń Birinshi orynbasary Beısen Tájibaev pen elimizdiń Bas parıasynyń aýdandyq fılıal tóraǵalarynyń qatysýymen jınalys ótkizdi.
Eske sala keteıik, Elbasy tapsyrmasy boıynsha «Nur Otan» partıasy birneshe aıdan beri Úkimetpen jáne óńirlik fılıaldarmen birlese otyryp, aldaǵy 5 jylǵa aýdandardy, qalalardy jáne oblystardy damytýdyń jańa baǵdarlamasyn ázirleý jumystaryn júrgizip jatyr. Atalǵan baǵdarlamalarda árbir jekelegen óńirdiń jergilikti erekshelikteri eskerilip, azamattardyń naqty qajettilikteri kórinis tabatyn bolady. Osy jumystardyń aıasynda «Nur Otan» partıasynyń basshylyǵy elimizdiń barlyq óńirin, tipti shalǵaı eldi mekenderine deıin aralap shyǵady.
Túrkistan oblysy ákiminiń baspasóz qyzmeti
