Belgili azamattyq belsendilerdi politsiiamen birigip, jalǵan aiyptaýmen aty shyqqan 54 jastaǵy Talǵat Kataýov kámeletke tolmaǵan qyzdarǵa seksýaldyq sipattaǵy zorlyq áreketi úshin 2 jyl 6 aiǵa bas bostandyǵynan aiyryldy, dep habarlaidy Dalanews.kz «Ýralskaia nedelia» basylymyna silteme jasap.
Túrkistan oblysynda ótken sot otyrysynda Kataýov Qylmystyq kodekstiń 122-babynyń 1-bóligi («On alty jasqa tolmaǵan adammen jynystyq qatynas nemese seksýaldyq sipattaǵy ózge de áreketter») boiynsha kináli dep tanylǵan.
«54 jastaǵy Talǵat Kataýovtyń ústinen birneshe ret shaǵym tústi. Ol alty men on tórt jas aralyǵyndaǵy birneshe qyzǵa qatysty azǵyndyq áreketter jasaǵan. Alaida, is alǵashynda 124-bap («Jas balalardy azǵyndyq jolǵa túsirý») boiynsha qaralǵanymen, sońǵy otyrysta prokýror aiypty jeńilirek bapqa aýystyrý týraly ótinish berdi», – delingen habarlamada.
Buǵan deiin Talǵat Kataýov Batys Qazaqstan men Túrkistan oblystaryndaǵy belsendiler arasynda «quqyq qorǵaýshylardyń tapsyrmasymen áreket etetin arandatýshy» retinde tanylǵan. Ol birneshe ret politsiiaǵa jalǵan aryz túsirip, sonyń kesirinen birqatar belsendiler negizsiz aiyppen ákimshilik qamaýǵa alynǵan.
2000 jyldardyń ortasynda Kataýov Bókei ordasy aýdanynda mektep direktory qyzmetin atqarǵan, biraq oqýshy qyzǵa qatysty ádepsiz áreketi úshin qyzmetten bosatylǵan edi. Al 2024 jyldyń tamyz aiynda onyń týǵan jieni de jynystyq zorlyq qurbany bolǵanyn málimdegen.
«15 jastaǵy jasóspirim anasyna toǵyz jasynan bastap nemere aǵasy Talǵat Kataýovtyń zorlyǵyna birneshe ret ushyraǵanyn aitqan. Bul áreketter ata-anasy úide joq kezde jasalǵan. Anasynyń aryzy boiynsha politsiia 120-baptyń 4-bóligi («Birneshe ret jasalǵan zorlaý») boiynsha qylmystyq is qozǵaǵanymen, birneshe aiǵa sozylǵan tergeý nátijesiz aiaqtalǵan. Jábirlenýshi qyz poligrafiialyq synaqtan, basqa da saraptamalardan ótip, aýyr psihologiialyq kúizelisti bastan keshken», – dep jazdy basylym.
Sonymen qatar, qyzdyń anasy politsiia qyzmetkerleriniń isine birneshe ret shaǵym túsirgen. Otbasynyń qarjylyq múmkindigi shekteýli bolǵandyqtan, advokatty memleket taǵaiyndaǵan. Jeltoqsan aiynda politsiia departamenti Kataýovqa qatysty qylmystyq isti «qylmys quramy anyqtalmady» degen negizben jaýyp tastaǵan edi.
Qoǵam ókilderi men belsendiler bul sheshimdi ádiletsiz ári taǵaiyndalǵan jazany tym jumsaq dep baǵalap otyr.
