Búgin BQO ákimi Narıman Tóreǵalıevtyń qatysýymen aýyldyq okrýgterdegi veterınar mamandarǵa 106 birlik qyzmettik avtokóliktiń kiltin tabys etý rásimi ótti,- dep habarlaıdy Dalanews.kz

Bul kólikter zamanaýı veterınarıalyq qural-jabdyqtarmen tolyq jabdyqtalǵan jáne eldi mekenderde veterınarıalyq qyzmettiń jyldam ári tıimdi bolýyn qamtamasyz etpek.

Atalǵan is-shara Memleket basshysynyń veterınarıa salasyn damytý jónindegi tapsyrmalaryn oryndaýǵa baǵyttalǵan júıeli jumystyń bir bóligi bolyp tabylady. Veterınarıalyq uıymdarǵa jańa avtokólikterdi tabystaý – aýyl sharýashylyǵynyń qaýipsizdigin qamtamasyz etýge, mal aýrýlarynyń aldyn alýǵa jáne veterınarıalyq baqylaýdy kúsheıtýge sep bolady.

«Óńirimizde veterınarıalyq uıymdardyń materıaldyq-tehnıkalyq bazasyn veterınarıalyq pýnkttermen, mal qorymdarymen, avtokóliktermen  jabdyqtaý jumystary júzege asyrylýda. Sońǵy eki jylda halyqtyń ómirin qamtamasyz etetin salalardyń materıaldyq-tehnıkalyq bazasyn jaqsartý úshin oblystyq búdjetten 10 mlrd teńgege tótenshe jaǵdaı, orman sharýashylyǵy, komýnaldyq sharýashylyǵy, veterınarıa, bilim men densaýlyq salalaryna 700-ge jýyq arnaıy tehnıkalar satyp alynǵan bolatyn. Al bıyl oblys boıynsha 5 mıllıard teńgege jýyq qarajatqa 200-ge jýyq arnaıy tehnıka satyp alý josparlanyp otyr. Sonyń aıasynda jýyrda «Batysırrıgasıa» mekemesine 18 birlik, búgin veterınarıalyq stansıalarǵa 106 arnaıy tehnıka berildi», - dedi oblys ákimi Narıman Tóreǵalıev.

Bul bastamalar óńirdegi veterınarıalyq jáne agrarlyq ınfraqurylymdy jańǵyrtýǵa baǵyttalǵan mańyzdy qadamdardyń biri.