Prezident kólik-logistika salasyn jańǵyrtý boiynsha naqty tapsyrmalar bergen bolatyn. Ekonomikanyń kúre tamyry – jol. Kez kelgen óńirdiń damýyna sapaly joldardyń bolýy úlken áserin tigizedi, – dep habarlaidy Dalanews.kz BQO ákiminiń baspasóz qyzmetine silteme jasap.
Óńir boiynsha birqatar iri jol qurylystary júzege asýda. Oblystyń shalǵai ornalasqan Kaztalov, Bókeiordasy jáne Jánibek aýdandarynda ótken jyldardan kele jatqan respýblikalyq mańyzy bar 245 shaqyrym jol kúrdeli jóndeýden ótip, nátijesinde shalǵai aýdandardyń oblys ortalyǵymen bailanysy oń sheshim tapty.
Sonymen qatar, respýblikalyq mańyzy bar 144 shaqyrym Podstepnoe - Fedorovka - Resei Federatsiiasy shekarasyna deiingi joldy qaita jańǵyrtý jumystary jalǵasýda. Qazirgi tańda 60 shaqyrymǵa jýyq jol jóndeldi.
Oblystyq mańyzy bar avtomobil joldaryn jóndeý boiynsha Barbastaý – Aqjaiyq - Inder (308 km, aiaqtalǵany 50 km) jáne Jańaqala – Bisen (210 km, aiaqtalǵany 23 km) baǵytyndaǵy joldardyń qurylysy júrýde.
Úkimettiń qoldaýymen jyl saiyn jol qurylystaryn júrgizý úshin qarajat ýaqytyly bólinýde. Ótken jyly 82 mlrd. teńgege 562 shaqyrym jol jóndelse, biylǵy jyly 92 mlrd.teńgeden astam qarjyǵa 642 shaqyrym jol jóndelýde.
Al, keler 2025 jyly osyndai kólemdegi joldardy jóndeý josparlanyp otyr. Sondai-aq, oblys ortalyǵy Oral qalasyndaǵy kóshe joldaryn jóndeý boiynsha da jumystar júrgizilýde. Ótken jyly 3,6 mlrd.teńgege Oral qalasynda 58 shaqyrym jol jóndelse, biylǵy jyly 4,3 mlrd teńgege 50 shaqyrymnan astam jol jóndeldi.
