The Marco Polo Project halyqaralyq elektromobilder ekspeditsiiasy tarihi Uly Jibek joly boiymen sapar shegýde. Uzyndyǵy shamamen 15 myń shaqyrym bolatyn joba Rim men Gonkongty bailanystyryp, 12 memlekettiń aýmaǵyn qamtidy. Ekspeditsiia 2026 jyly 13 maýsymda bastalyp, 26 shildege deiin jalǵasady, dep habarlaidy dalanews.kz.
Delegatsiia quramya 38 qatysýshydan (júrgizýshilerdi qosqanda 59 adam) turady. Olardyń qatarynda ǵalymdar, investorlar jáne turaqty damý salasynyń mamandary bar. Olar BYD markaly 13 elektromobilmen saparǵa shyqqan.
Jobany M31 Capital kompaniiasynyń negizin qalaýshy Patrik Chjýn jáne Kolýmbiia ýniversitetiniń Turaqty damý ortalyǵynyń ókilderi Djeffri jáne Sonia Erlih Saks uiymdastyrǵan.
Patrik Chjýnnyń aitýynsha, ekspeditsiianyń basty maqsaty – ózara qurmetke negizdelgen álemdik bailanysty nyǵaitý.
– Búginde álem tym bólshektenip ketti. Biz bir núkteden ekinshisine ushaqpen tez jetemiz de, aradaǵy keńistikti, ondaǵy adamdar men mádenietti baiqamaimyz. Bizdiń maqsatymyz – álemdi jaqyndastyrý. Eger jetkizgimiz keletin basty oi bolsa, ol beibitshilikke úndeý, – dedi Patrik Chjýn.
Qazaqstandaǵy baǵyt Aqtaý, Mańǵystaý, Beineý, Shymkent jáne Taraz arqyly ótti. Al delegatsiianyń elimizdegi saparynyń sońǵy núktesi 13-14 shilde kúnderi Almaty qalasy boldy.
Patrik Chjýn úshin bul sapar óńirdiń tarihi murasymen jaqynyraq tanysýǵa múmkindik bergen.
– Almaty – Uly Jibek jolyndaǵy eń mańyzdy qalalardyń biri. Men úshin bul jerge kelý – osy tarihi mekendi óz kózimmen kórý múmkindigi. Biz jai ǵana saiahattap júrgen joqpyz, adamdardyń oqiǵasyn jinap, osy óńirdiń mańyzyn jańasha tanyp-bilgimiz keledi, – dedi ol.
Ekspeditsiiada Patrik Chjýnnyń uly Djimmi de bar. Jas saiahatshy Almatynyń asqaq tabiǵaty erekshe áser qaldyrǵanyn aitty. Sondai-aq, qazaqtyń ulttyq taǵamdarymen tanysqan ol jylqy etinen jasalǵan taǵamdarǵa saqtyqpen qaraǵanymen, jergilikti ashananyń ózge dámderin joǵary baǵalaǵanyn jetkizdi.
Patrik Chjýn ekologiialyq máselege de erekshe toqtaldy.
– Mundaǵy tabiǵattyń sulýlyǵyn sózben jetkizý qiyn. Biraq ol óte názik. Biz klimatty qorǵaýdyń qanshalyqty mańyzdy ekenin búkil álemge kórsetkimiz keledi. Eger búgin tabiǵatty qorǵamasaq, erteń bul úderisti toqtatý múmkin bolmai qalýy múmkin, – dedi ol.
Almaty qalasy Týrizm basqarmasynyń málimetinshe, megapoliste delegatsiia úshin qalanyń tabiǵi-rekreatsiialyq áleýeti men kreativti ekonomikasyn tanystyrýǵa baǵyttalǵan arnaiy baǵdarlama uiymdastyrylǵan.
Ekspeditsiia qatysýshylary Qazaqstan óńirleriniń tabiǵaty men mádeni dástúrlerimen tanysty. Almatyǵa kelgende olar «Shymbulaq» taý kýrortyn aralap, Almaty oblysyndaǵy búrkitshilik ónerimen tanysty. Sonymen qatar «Gorelnik» vizit ortalyǵynda jáne jańa Almaty Museum of Arts mýzeiinde boldy.
Qazaqstandaǵy kezeń aiaqtalǵannan keiin ekspeditsiia Qytaiǵa bet alady. Alda olar joldyń sońǵy úshten bir bóligin júrip ótip, Úrimji, Sian, Shanhai jáne Shenchjen arqyly sońǵy mejesi – Gonkongqa jetedi.
Ekspeditsiia barysynda túsirilgen derekti film, vlogtar men podkasttar álemniń jetekshi mediaplatformalarynda jariialanady. Bul Almatyny tarihi murasy men turaqty damý qaǵidattaryn ushtastyrǵan Eýraziiadaǵy mańyzdy toraptardyń biri retinde halyqaralyq deńgeide tanytýǵa múmkindik beredi.
