Biylǵy maýsym aiy Qazaqstanda sońǵy jyldardaǵy eń ystyq kezeńderdiń biri retinde tirkeldi. Eldiń birneshe óńirinde kópjyldyq temperatýralyq kórsetkishter jańardy. Olardyń ishinde Pavlodarda 71 jyl boiy saqtalǵan rekord ta bar, dep habarlaidy dalanews.kz.
"Qazgidromettiń" málimetinshe, biylǵy maýsymda elimizdiń basym bóliginde aýa temperatýrasy klimattyq normadan 1–5 gradýsqa joǵary boldy. Kúndiz kóptegen óńirde synap baǵany +30…+38 gradýsqa, al ońtústik aimaqtarda kei jerlerde +43 gradýsqa deiin kóterildi. Mamandar muny qurǵaq tropikalyq aýa massalarynyń áserimen túsindirdi.
1 maýsymda Pavlodarda aýa temperatýrasy +36,8 gradýsqa jetip, 1955 jyly tirkelgen +36,1 gradýstyq kórsetkishten asty. Osylaisha qalada 71 jyldan beri saqtalyp kelgen temperatýralyq rekord jańardy.
Budan bólek, Almatyda da 1967 jylǵy, al Astanada 2023 jylǵy eń joǵary temperatýralyq kórsetkishter jańartyldy. Ai sońynda Semei men Óskemende de burynǵy rekordtar tirkelgen temperatýradan joǵary mán kórsetildi.
Mamandardyń aitýynsha, mundai aptap ystyqqa Qazaqstan aýmaǵyna engen qurǵaq ári ystyq tropikalyq aýa massalary sebep bolǵan. Sonymen qatar maýsym aiynda elimizdiń birqatar óńirinde nóser jaýyn jaýyp, kei jerlerde táýliktik jaýyn-shashyn mólsheri ailyq normadan birneshe ese asyp ketken.
