Qazaqstanda shomylý maýsymy bastalǵaly beri 69 bala sýǵa batyp qaza tapty. Osyǵan bailanysty Ishki ister ministrligi ata-analardy balalardy sý aidyndarynyń mańynda qaraýsyz qaldyrmaýǵa shaqyrdy, dep habarlaidy dalanews.kz.
Vedomstvonyń málimetinshe, qaiǵyly jaǵdailardyń basym bóligi shomylýǵa tyiym salynǵan jáne arnaiy jabdyqtalmaǵan aýmaqtarda bolǵan.
IIM profilaktikalyq jumysty úilestirý komitetiniń tóraǵasy Arman Sadanov turǵyndarǵa tek qaýipsiz ári arnaiy jabdyqtalǵan jaǵajailarda shomylý keregin eskertti.
"Balalardy sý aidyndarynyń mańynda qaraýsyz qaldyrmańyzdar. Olarǵa beitanys jerlerde shomylýdyń qaýipti ekenin túsindirińizder. Sondai-aq aptap ystyqtan keiin sýyq sýǵa birden túsýge bolmaidy", – dedi ol.
Ministrlik ruqsat etilmegen jerlerde shomylǵany úshin ákimshilik jaýapkershilik qarastyrylǵanyn da eske saldy.
Jyl basynan beri osy talapty buzǵan 2700-den astam azamat jaýapkershilikke tartylǵan.
"Qurmetti ata-analar, balalardyń qaýipsizdigi eń aldymen sizderdiń jaýapkershilikterińizde ekenin umytpańyzdar", – dedi Arman Sadanov.
