Oral qalasynyń Juldyz shaǵynaýdanynda kerneýi 110/10 kilovolttyq jańa qosalqy stantsiianyń ashylý saltanaty ótti. Saltanatty sharaǵa Batys Qazaqstan oblysynyń ákimi Nariman Tóreǵaliev qatysty.
Jańa infraqurylym nysany – qalanyń energetikalyq áleýetin arttyratyn, turǵyndar ómiriniń sapasyn jaqsartýǵa baǵyttalǵan mańyzdy joba. Qosalqy stantsiianyń qurylysy 2024 jyly bastalyp, respýblikalyq biýdjetten 3,2 mlrd teńge jáne jergilikti biýdjetten 190 mln teńge qarajat bólindi.
Qosalqy stantsiiada eki kúshtik transformator, kerneýi 110 kilovolttyq 6 tizbekti áýe jelisi (uzyndyǵy 300 metr), 4 ankerli tirek, 5 kólikke arnalǵan avtoturaǵy bar jóndeý bazasy jáne ákimshilik-turmystyq korpýs salyndy.
Joba Juldyz, eski áýejai jáne 6, 7, 8, 9, 10-shaǵynaýdandardaǵy turǵyndardy turaqty ári sapaly elektr qýatymen qamtamasyz etýge, sondai-aq óndiristik aimaqtardyń elektrmen jabdyqtalý senimdiligin arttyrýǵa múmkindik beredi. Qosalqy stantsiiada «Alageum Electric» qazaqstandyq óndirýshisiniń joǵary voltty zamanaýi jabdyqtary ornatylǵan.
Nysan tolyq iske qosylǵannan keiin «Batys Qazaqstan aimaqtyq elektr jelilik kompaniiasy» JShS mamandary munda turaqty qyzmet atqaratyn bolady.
Is-shara barysynda óńir basshysy merdiger uiym qyzmetkerlerine alǵysyn bildirip, jańa nysannyń el igiligine qyzmet etetinine senim bildirdi.
