ورال قالاسىنىڭ جۇلدىز شاعىناۋدانىندا كەرنەۋى 110/10 كيلوۆولتتىق جاڭا قوسالقى ستانسيانىڭ اشىلۋ سالتاناتى ءوتتى. سالتاناتتى شاراعا باتىس قازاقستان وبلىسىنىڭ اكىمى ناريمان تورەعالييەۆ قاتىستى.

جاڭا ينفراقۇرىلىم نىسانى – قالانىڭ ەنەرگەتيكالىق الەۋەتىن ارتتىراتىن، تۇرعىندار ءومىرىنىڭ ساپاسىن جاقسارتۋعا باعىتتالعان ماڭىزدى جوبا. قوسالقى ستانسيانىڭ قۇرىلىسى 2024 جىلى باستالىپ، رەسپۋبليكالىق بيۋدجەتتەن 3،2 ملرد تەڭگە جانە جەرگىلىكتى بيۋدجەتتەن 190 ملن تەڭگە قاراجات ءبولىندى.

قوسالقى ستانسيادا ەكى كۇشتىك ترانسفورماتور، كەرنەۋى 110 كيلوۆولتتىق 6 تىزبەكتى اۋە جەلىسى (ۇزىندىعى 300 مەتر)، 4 انكەرلى تىرەك، 5 كولىككە ارنالعان اۆتوتۇراعى بار جوندەۋ بازاسى جانە اكىمشىلىك-تۇرمىستىق كورپۋس سالىندى.

جوبا جۇلدىز، ەسكى اۋەجاي جانە 6، 7، 8، 9، 10-شاعىناۋداندارداعى تۇرعىنداردى تۇراقتى ءارى ساپالى ەلەكتر قۋاتىمەن قامتاماسىز ەتۋگە، سونداي-اق وندىرىستىك ايماقتاردىڭ ەلەكترمەن جابدىقتالۋ سەنىمدىلىگىن ارتتىرۋعا مۇمكىندىك بەرەدى. قوسالقى ستانسيادا «Alageum Electric» قازاقستاندىق ءوندىرۋشىسىنىڭ جوعارى ۆولتتى زاماناۋي جابدىقتارى ورناتىلعان.

نىسان تولىق ىسكە قوسىلعاننان كەيىن «باتىس قازاقستان ايماقتىق ەلەكتر جەلىلىك كومپانياسى» ج ش س ماماندارى مۇندا تۇراقتى قىزمەت اتقاراتىن بولادى.

ءىس-شارا بارىسىندا ءوڭىر باسشىسى مەردىگەر ۇيىم قىزمەتكەرلەرىنە العىسىن ءبىلدىرىپ، جاڭا نىساننىڭ ەل يگىلىگىنە قىزمەت ەتەتىنىنە سەنىم ءبىلدىردى.