Qazaqstan Respýblikasy Parlamenti Senatynyń Tóraǵasy Máýlen Áshimbaev jumys saparymen Batys Qazaqstan oblysyna kelip, barlyq deńgeidegi máslihat depýtattarymen, Qazaqstan halqy Assambleiasy ókilderimen, óńir jurtshylyǵymen jáne jastarmen kezdesti, dep habarlaidy Dalanews.kz
Kún tártibinde – Memleket basshysynyń Ulttyq Quryltaidyń IV otyrysynda aitylǵan tapsyrmalaryn iske asyrý, Senattyń óńirlerdi damytýǵa járdemdesýin odan ári kúsheitý joldary, sondai-aq negizgi baǵyttar boiynsha Palatanyń máslihattarmen ózara is-qimyldy nyǵaitý máseleleri boldy.
"Memleket basshysy Qasym-Jomart Kemeluly Toqaev Ulttyq Quryltaidyń IV otyrysynda Qazaqstannyń damýynyń ózekti máselelerine keńinen toqtaldy. Óńirlerdiń ekonomikasyn damytý negizgi baǵyttardyń biri retinde belgilendi. Quryltaida ishki saiasat, ideologiia, bilim berý máselelerine erekshe nazar aýdaryldy. Barlyq aitylǵan bastamalar ádiletti, qaýipsiz, taza jáne myqty Qazaqstan qurý ideiasyn iske asyrýǵa baǵyttalǵan. Biz osy jáne basqa da mindetterdi iske asyrý úshin júieli jáne tiimdi jumys isteýimiz kerek", - dedi Máýlen Áshimbaev.
Sapar barysynda Batys Qazaqstan oblysynyń ákimi Nariman Tóreǵaliev QR Prezidenti Qasym-Jomart Toqaev halyqtyń ómir súrý sapasyn arttyrýdy basty basymdyqtardyń biri retinde belgilep, sondai-aq óńirlerdi damytý boiynsha naqty mindetter qoiǵanyn atap ótti. Batys Qazaqstan oblysynda olardy iske asyrý boiynsha júieli jumystar júrgizilýde.
"Sońǵy eki jylda óńir ekonomikasyna 1,2 trln teńge investitsiia tartyldy jáne 2025 jyly bul kórsetkishti odan ári arttyrý josparlanýda. Atap aitqanda, 104 mlrd teńgege 21 investitsiialyq joba iske qosyldy. Aǵymdaǵy jyly da birqatar strategiialyq mańyzdy obektilerdiń, sonyń ishinde qoqysty qaita óńdeý kesheniniń, kún elektr stantsiiasynyń, jylyjai sharýashylyǵynyń, metanol óndiretin gaz - himiia kesheniniń jáne untaq jabyndaryn shyǵaratyn zaýyttyń qurylysy iske qosylady dep kútilýde", - dedi Nariman Tóreǵaliev.
Turǵyn úi qurylysy aiasynda 2025 jyly oblysta 580 myń sharshy metr turǵyn úi paidalanýǵa beriledi.
Áleýmettik nysandardy salý jumystary belsendi túrde jalǵasýda. Sońǵy eki jylda óńirde 20-dan astam mektep, 38 meditsinalyq mekeme, 6 mádeniet nysany jáne 8 sport kesheni paidalanýǵa berildi. Jol infraqurylymyn jóndeý jumystary jalǵasýda-osy kezeńde 1000 shaqyrymnan astam avtojol jańartylyp, eldi mekenderdiń kóliktik qoljetimdiligin aitarlyqtai jaqsardy.
2025 jyly oblysta 7 jańa mekteptiń qurylysy júrgizilýde, al aǵymdaǵy jyly taǵy 10 bilim berý mekemesiniń qurylysy bastalady. Barlyq 12 aýdan ortalyǵy sport keshenderimen qamtamasyz etilgen, al aýyldyq eldi mekenderde 12 qosymsha sport nysandarynyń qurylysy josparlanýda. Sondai-aq, biyl 14 meditsinalyq mekeme salynyp, Oral qalasynyń barlyq teatrlaryna kúrdeli jóndeý jumystary josparlanǵan.
Energetikalyq jáne turǵyn úi-kommýnaldyq infraqurylymdy jańǵyrtýǵa erekshe kóńil bólinedi. Oral qalasynda jańa elektr qosalqy stantsiialary salynýda, jylý jelileri men káriz sorǵy stantsiialary jańǵyrtylýda.
Memleket basshysynyń aýyldyq jerlerde ómir súrý sapasyn arttyrý jónindegi tapsyrmalaryn iske asyrý sheńberinde ótken jyldan bastap oblysta "Qaladan aýylǵa" pilottyq baǵdarlamasy jumys isteidi. Ol aýyldyq eldi mekenderdi qoldaýǵa jáne ómir súrýge qolaily jaǵdai jasaýǵa baǵyttalǵan. Baǵdarlama aiasynda 104 otbasy qonys aýdardy, al 2025 jyly baǵdarlamaǵa qatysýshylar úshin turǵyn úi satyp alýǵa 1,4 mlrd teńge bólindi.
Sapar barysynda Máýlen Áshimbaev óńirdiń birqatar ónerkásiptik kásiporyndary men áleýmettik nysandaryn, onyń ishinde "Packaging Systems" JShS men "Kvant" JShS aralap, óndiristik jumys barysymen tanysyp, eńbek ujymdarymen kezdesý ótkizdi. Onda óńir turǵyndaryn tolǵandyratyn ózekti máselelerdi, sondai-aq óndiristerdi odan ári keńeitý jáne investitsiialar tartý perspektivalaryn talqylady.
Sondai-aq ol «Aqjaiyq» múmkindigi shekteýli jandardy ońaltý jáne abilitatsiialaý ortalyǵyna bardy. Jaqynda ǵana ashylǵan bul ortalyq 150 orynǵa eseptelgen. Munda azamattarǵa robottandyrylǵan keshendermen jabdyqtalǵan emdik dene shynyqtyrý kabineti qyzmet kórsetedi. Sonymen qatar, parasportshylarǵa arnalǵan bochcha zaly, bassein jáne arnaiy ońaltý kabinetteri bar oqý korpýsy jumys isteidi.
Sonymen qatar, QR Parlamenti Senatynyń Tóraǵasy Derqól kentinde bolyp, kóktemgi sý tasqynynan zardap shekken azamattar úshin salynǵan jańa turǵyn úilerdi aralady.
