Batalov Qarasai aýdanyndaǵy sport keshenderiniń qurylysymen tanysty
Sport keshenderiniń qurylys jumystarymen tanysqan oblys basshysy qurylysty belgilegen merzimde tapsyryp, aýyl turǵyndaryna syi jasaýdyń mańyzy zor ekenin atap ótti.
Raiymbek aýylynda boi kóterip kele jatqan sport kesheni memlekettik-jekemenshik áriptestik aiasynda salynyp jatyr. Qazirgi tańda elimizde memleket pen jekelegen kásipkerler áleýmettik nysandar salý isin jolǵa qoiǵany belgili. Almaty oblysynda bul baǵytta kóptegen balabaqshalar salynyp, óńirde memlekettik-jekemenshik áriptestik salasy joǵary deńgeide damyǵan.
Raiymbek aýylynda salynyp jatqan sport kesheniniń qurylys jumystary ústimizdegi jyldyń 19-qańtarynda bastalǵan bolatyn. Eger jumys barysy josparǵa sai júrse, qońyr kúzde aýyl turǵyndary jańa sport kesheniniń igiligin kóretin bolady. Óz kezeginde Amandyq Batalovqa jergilikti bilik ókilderi sport keshenin salýǵa 1,69 gektar jer telimin bergenderin tilge tiek etti.
– Sport kesheni úsh bólikten turady. Joba boiynsha ǵimarttyń birinshi qabatynda jastardy boks pen kúreske baýlityn zaldar ornalassa, ekinshi qabatta jattyǵý jáne biliard zaly jumys isteitin bolady. Keshenniń tehnikalyq bóliginde, iaǵni jertólesinde kassa, demalys bólmesi, jattyǵýshylardyń kiim aýystyratyn, massaj jasaityn jáne jýynatyn bólmeleri ornalasady. Al sport kesheniniń úshinshi bóliginde 300 orynǵa arnalǵan ámbebap zal jumys isteidi. Munda jastar voleibol, basketbol, gandbol jáne shaǵyn-fýtbol oinap, shynyǵa alady, – dep qurylys kompaniiasynyń ókilderi oblys ákimine sport kesheni jaiynda qysqasha aityp berdi.
Qazirgi tańda nysannyń shuńqyry qazylyp, betondaý jumystary men metall qurastyrmalary tolyqtai aiaqtalǵan. Qurylys jumystarmen jiti tanysqan Amandyq Batalov merdiger kompaniiaǵa birqatar eskertýler jasady.
– Menińshe, qurylys basyndaǵy jumysty shiratyp, qarqyndy tiimdi baǵytta uiymdastyrý kerek. Sonymen qatar jumysty sapaly atqarýǵa basa mán berińizder, – dedi oblys ákimi.
Budan keiin Amandyq Batalov Shamalǵan qalasynda salynyp jatqan deneshynyqtyrý jáne saýyqtyrý kesheniniń jumysymen de tanysty. Jalpy aýmaǵy 7 300 sharshy metrdi quraityn keshenniń jumysy aiaqtalýǵa taiaý. Alty bólikten turatyn sport kesheninde 300 adamǵa arnalǵan ámbebap zalda jastardyń voleibol, basketbol, gandbol jáne shaǵyn-fýtbolmen ainalysýyna jaǵdai jasalynǵan. Sonymen qatar sport kesheninde shamalǵandyq órenderdiń shyǵys jekpe-jegi, boks, kúrespen ainalysýyna bolady. Eń bastysy, mundai eresekter men balalarǵa arnalǵan bassein bar.
Atshaptyrym aýmaqty alyp jatqan jańa sport kesheni Shamalǵan aýyly turǵyndarynyń sportpen ainalysyp, densaýlyqtaryn jaqsartýyna keńinen jol ashady. Sport kesheniniń qurylys jumysymen tanysqan oblys ákimi Amandyq Ǵabbasuly sport keshenine kirip, shyǵý aýmaǵyn keńeitýdi, keshenniń aldyna kórik beretin kóshetter men kógal egý máselesine de basa mán berý kerek ekenin eskertti. Oblys ákimi sport kesheniniń qorshaýy men jaryqtandyrý júiesi zaman talabyna sai jasalǵanyn atap ótti. Sonymen qatar sport kesheniniń «Úshqońyr» degen ataýyn latyn tilinde jazyp qoiýdy usyndy.
Amandyq Batalov ǵimarattyń ishin kirgen sátinde bassein ornalasqan bóliktiń qabyrǵasyna aqparattyq LED-ekran men qabyrǵa saǵattaryn ornatýdy, basqa da qajetti kerek-jaraqtardy umyt qaldyrmaýdy tapsyrdy. Kezdesý sońynda Amandyq Batalov, jalpy alǵanda, jumystar óz deńgeiinde atqarylǵanyn aityp, rizashylyǵyn bildirdi.
Qazirgi tańda keshendi sylaý isine 250 adam jumyldyrylǵan. Búginde «Úshqońyr» deneshynyqtyrý-saýyqtyrý kesheniniń ishki jumystarynyń 95 paiyzy, syrtqy jumystarynyń 85 paiyzy aiaqtalǵan. Qurylys júrgizip jatqan merdigerler oblys ákimine 30 maýsymǵa deiin jumystardy tolyqtai aiaqtap, sport keshenin halyqtyń igiligine berýge ýáde berdi.
Ainur JUMAHAN
