كۇنى كەشە عانا الماتى وبلىسىنىڭ اكىمى اماندىق باتالوۆ قاراساي اۋدانىنا جۇمىس ساپارىمەن بارىپ، اۋدان كولەمىندە اتقارىلىپ جاتقان جۇمىستاردىڭ بارىسىمەن تانىستى. اكىمنىڭ نازارىنا قاراساي اۋدانىنا قاراستى رايىمبەك پەن شامالعان اۋىلىندا سالىنىپ جاتقان سپورت كەشەندەرىنىڭ قۇرىلىس جۇمىستارى بىردەن ىلىكتى.

سپورت كەشەندەرىنىڭ قۇرىلىس جۇمىستارىمەن تانىسقان وبلىس باسشىسى قۇرىلىستى بەلگىلەگەن مەرزىمدە تاپسىرىپ، اۋىل تۇرعىندارىنا سىي جاساۋدىڭ ماڭىزى زور ەكەنىن اتاپ ءوتتى.

رايىمبەك اۋىلىندا بوي كوتەرىپ كەلە جاتقان  سپورت كەشەنى مەملەكەتتىك-جەكەمەنشىك ارىپتەستىك اياسىندا سالىنىپ جاتىر. قازىرگى تاڭدا ەلىمىزدە مەملەكەت پەن جەكەلەگەن كاسىپكەرلەر الەۋمەتتىك نىساندار سالۋ ءىسىن جولعا قويعانى بەلگىلى. الماتى وبلىسىندا بۇل باعىتتا كوپتەگەن بالاباقشالار سالىنىپ، وڭىردە مەملەكەتتىك-جەكەمەنشىك ارىپتەستىك سالاسى جوعارى دەڭگەيدە دامىعان.

رايىمبەك اۋىلىندا سالىنىپ جاتقان سپورت كەشەنىنىڭ قۇرىلىس جۇمىستارى ۇستىمىزدەگى جىلدىڭ 19-قاڭتارىندا باستالعان بولاتىن. ەگەر جۇمىس بارىسى جوسپارعا ساي جۇرسە، قوڭىر كۇزدە اۋىل تۇرعىندارى جاڭا سپورت كەشەنىنىڭ يگىلىگىن كورەتىن بولادى. ءوز كەزەگىندە اماندىق باتالوۆقا  جەرگىلىكتى بيلىك وكىلدەرى سپورت كەشەنىن سالۋعا 1،69 گەكتار جەر تەلىمىن بەرگەندەرىن تىلگە تيەك ەتتى.

– سپورت كەشەنى ءۇش بولىكتەن تۇرادى. جوبا بويىنشا عيمارتتىڭ ءبىرىنشى قاباتىندا جاستاردى بوكس پەن كۇرەسكە باۋليتىن زالدار ورنالاسسا، ەكىنشى قاباتتا جاتتىعۋ جانە بيليارد زالى جۇمىس ىستەيتىن بولادى. كەشەننىڭ تەحنيكالىق بولىگىندە، ياعني جەرتولەسىندە كاسسا، دەمالىس بولمەسى،  جاتتىعۋشىلاردىڭ كيىم اۋىستىراتىن، ماسساج جاسايتىن جانە جۋىناتىن بولمەلەرى ورنالاسادى. ال سپورت كەشەنىنىڭ ءۇشىنشى بولىگىندە 300 ورىنعا ارنالعان امبەباپ زال جۇمىس ىستەيدى. مۇندا جاستار ۆولەيبول، باسكەتبول، گاندبول جانە شاعىن-فۋتبول ويناپ، شىنىعا الادى، – دەپ قۇرىلىس كومپانياسىنىڭ وكىلدەرى وبلىس اكىمىنە سپورت كەشەنى جايىندا قىسقاشا ايتىپ بەردى.

قازىرگى تاڭدا نىساننىڭ شۇڭقىرى قازىلىپ، بەتونداۋ جۇمىستارى مەن مەتالل قۇراستىرمالارى تولىقتاي اياقتالعان. قۇرىلىس جۇمىستارمەن ءجىتى تانىسقان اماندىق باتالوۆ مەردىگەر كومپانياعا ءبىرقاتار ەسكەرتۋلەر جاسادى.

– مەنىڭشە، قۇرىلىس باسىنداعى جۇمىستى شيراتىپ، قارقىندى ءتيىمدى باعىتتا ۇيىمداستىرۋ كەرەك. سونىمەن قاتار جۇمىستى ساپالى اتقارۋعا باسا ءمان بەرىڭىزدەر، – دەدى وبلىس اكىمى.

بۇدان كەيىن اماندىق باتالوۆ شامالعان قالاسىندا سالىنىپ جاتقان دەنەشىنىقتىرۋ جانە ساۋىقتىرۋ كەشەنىنىڭ جۇمىسىمەن دە تانىستى. جالپى اۋماعى 7 300 شارشى مەتردى قۇرايتىن كەشەننىڭ جۇمىسى اياقتالۋعا تاياۋ.  التى بولىكتەن تۇراتىن سپورت كەشەنىندە 300 ادامعا ارنالعان امبەباپ زالدا جاستاردىڭ ۆولەيبول، باسكەتبول، گاندبول جانە شاعىن-فۋتبولمەن اينالىسۋىنا جاعداي جاسالىنعان. سونىمەن قاتار سپورت كەشەنىندە شامالعاندىق ورەندەردىڭ شىعىس جەكپە-جەگى، بوكس، كۇرەسپەن اينالىسۋىنا بولادى. ەڭ باستىسى، مۇنداي ەرەسەكتەر مەن بالالارعا ارنالعان باسسەين بار.

اتشاپتىرىم اۋماقتى الىپ جاتقان جاڭا سپورت كەشەنى شامالعان اۋىلى تۇرعىندارىنىڭ سپورتپەن اينالىسىپ، دەنساۋلىقتارىن جاقسارتۋىنا كەڭىنەن جول اشادى. سپورت كەشەنىنىڭ قۇرىلىس جۇمىسىمەن تانىسقان وبلىس اكىمى اماندىق عابباس ۇلى سپورت كەشەنىنە كىرىپ، شىعۋ اۋماعىن كەڭەيتۋدى، كەشەننىڭ الدىنا كورىك بەرەتىن كوشەتتەر مەن كوگال ەگۋ ماسەلەسىنە دە باسا ءمان بەرۋ كەرەك ەكەنىن ەسكەرتتى. وبلىس اكىمى سپورت كەشەنىنىڭ قورشاۋى مەن جارىقتاندىرۋ جۇيەسى زامان تالابىنا ساي جاسالعانىن اتاپ ءوتتى. سونىمەن قاتار سپورت كەشەنىنىڭ «ءۇشقوڭىر» دەگەن اتاۋىن لاتىن تىلىندە جازىپ قويۋدى ۇسىندى.

اماندىق باتالوۆ عيماراتتىڭ ءىشىن كىرگەن ساتىندە باسسەين ورنالاسقان بولىكتىڭ قابىرعاسىنا اقپاراتتىق LED-ەكران مەن قابىرعا ساعاتتارىن ورناتۋدى، باسقا دا قاجەتتى كەرەك-جاراقتاردى ۇمىت قالدىرماۋدى تاپسىردى. كەزدەسۋ سوڭىندا اماندىق باتالوۆ، جالپى العاندا، جۇمىستار ءوز دەڭگەيىندە اتقارىلعانىن ايتىپ، ريزاشىلىعىن ءبىلدىردى.

قازىرگى تاڭدا كەشەندى سىلاۋ ىسىنە 250 ادام جۇمىلدىرىلعان. بۇگىندە «Úshqońyr» دەنەشىنىقتىرۋ-ساۋىقتىرۋ كەشەنىنىڭ ىشكى جۇمىستارىنىڭ 95 پايىزى، سىرتقى جۇمىستارىنىڭ 85 پايىزى اياقتالعان. قۇرىلىس جۇرگىزىپ جاتقان مەردىگەرلەر وبلىس اكىمىنە 30 ماۋسىمعا دەيىن جۇمىستاردى تولىقتاي اياقتاپ، سپورت كەشەنىن حالىقتىڭ يگىلىگىنە بەرۋگە ۋادە بەردى.

 

اينۇر جۇماحان