Onyń aitýynsha odaqtyń ortaq ustanymy joq, árkim kórpeni ózine qarai tartyp, osy uiymdy qurǵan áýel bastaǵy baǵyttan aýytqyp ketti.
"Bireý bireýdi tyńdamaidy. Eshkim eshkimge esesin jibergisi kelmeidi. Tartys-talas, salǵylasýdan ózge osy odaq bizge tittei paidasyn tigizbedi", – deidi Lýkashenko.
Ol Eýraziialyq odaqty qurýǵa uiytqy bolǵan Qazaqstan, Resei jáne Belarýstiń jáne uiymǵa keiinnen qosylǵan Armeniia men Qyrǵyzstannyń arasynda aýyzbirshilik joq ekenin aitty. Qurylǵaly beri daý-damaidan arylmai kele jatqan berekesiz odaqqa ózgeler de qosylýǵa qulyqty emes.
Belarýs basshysynyń pikirinshe odaqqa tóraǵalyq etetin árbir el óz usynysyn ortaǵa salýǵa quqyly, ózgeleri osy usynystyń odaqqa qanshalyqty paidaly bolaryn paiymdap, pátýa shyǵarýy kerek.
"Mundai usynystar joqtyń qasy. Odaqtyń aty bar da, zaty joq. Odaqtastardyń ortaq uiǵarymy joq. Mundai bolsa "bir-birimizdiń basymyzdy qatyrmai" tarqap tynaiyq. Bul odaqtan qaiyr bolmasa, árkim óz betinshe ketsin. Óz damýyn ózi aiqyndasyn", – dedi Lýkashenko.
Saiasattanýshy Dosym Sátpaevtyń pikirinshe bizdiń bilikke de mundai batyldyq qajet.
"Mysaly, Aleksandr Lýkashenko oiyn ashyq aitady. Onysy durys. Ol Eýraziialyq ekonomikalyq odaqtyń óz eline tiimsiz ekenin arakidik aityp otyrady.
Al Qazaqstan diplomatiialyq deńgeide bul rette lám-mim dep tis jarǵan emes.
Erte bolsyn, kesh bolsyn, bul túrimen Eýraziialyq ekonomikalyq odaq kúirep tynady. Tarihta ol tiimsizdik tanytqan, ózine múshe elderge óte kóp másele týdyrǵan qurylym retinde qalady", – deidi ol.
Saiasattanýshynyń aitýynsha, Qazaqstan úshin qazir eń tiimsizi — Reseimen aradaǵy odaq.
"Múmkin, Orta Aziialyq blok qurý týraly bastamany kóterip jibersek, jaqsy bolar ma edi?..
Ózbekstan prezidenti Shavkat Mirzieev onsyz da eki alaqanyn ysqylap muny qalap otyr. Temirdi qyzǵan kezde soq demekshi, aimaqtyq ekonomikalyq sol blokty quryp jiberý kerek sekildi.
Ne úshin deisizder me? Qytaiǵa, Reseige, Eýropalyq odaq pen AQSh-qa qatysty óz múddemizdi qorǵap qalý úshin. Iaǵni, oiymyzdy ashyq aitatyn kez keldi. Ol úshin osyndai alańqai kerek bizge...", – deidi Sátpaev.
