ونىڭ ايتۋىنشا وداقتىڭ ورتاق ۇستانىمى جوق، اركىم كورپەنى وزىنە قاراي تارتىپ، وسى ۇيىمدى قۇرعان اۋەل باستاعى باعىتتان اۋىتقىپ كەتتى.
"بىرەۋ بىرەۋدى تىڭدامايدى. ەشكىم ەشكىمگە ەسەسىن جىبەرگىسى كەلمەيدى. تارتىس-تالاس، سالعىلاسۋدان وزگە وسى وداق بىزگە تيتتەي پايداسىن تيگىزبەدى"، – دەيدى لۋكاشەنكو.
ول ەۋرازيالىق وداقتى قۇرۋعا ۇيىتقى بولعان قازاقستان، رەسەي جانە بەلارۋستىڭ جانە ۇيىمعا كەيىننەن قوسىلعان ارمەنيا مەن قىرعىزستاننىڭ اراسىندا اۋىزبىرشىلىك جوق ەكەنىن ايتتى. قۇرىلعالى بەرى داۋ-دامايدان ارىلماي كەلە جاتقان بەرەكەسىز وداققا وزگەلەر دە قوسىلۋعا قۇلىقتى ەمەس.
بەلارۋس باسشىسىنىڭ پىكىرىنشە وداققا ءتوراعالىق ەتەتىن ءاربىر ەل ءوز ۇسىنىسىن ورتاعا سالۋعا قۇقىلى، وزگەلەرى وسى ۇسىنىستىڭ وداققا قانشالىقتى پايدالى بولارىن پايىمداپ، ءپاتۋا شىعارۋى كەرەك.
"مۇنداي ۇسىنىستار جوقتىڭ قاسى. وداقتىڭ اتى بار دا، زاتى جوق. وداقتاستاردىڭ ورتاق ۇيعارىمى جوق. مۇنداي بولسا "ءبىر-بىرىمىزدىڭ باسىمىزدى قاتىرماي" تارقاپ تىنايىق. بۇل وداقتان قايىر بولماسا، اركىم ءوز بەتىنشە كەتسىن. ءوز دامۋىن ءوزى ايقىنداسىن"، – دەدى لۋكاشەنكو.
ساياساتتانۋشى دوسىم ساتپايەۆتىڭ پىكىرىنشە ءبىزدىڭ بيلىككە دە مۇنداي باتىلدىق قاجەت.
"مىسالى، الەكساندر لۋكاشەنكو ويىن اشىق ايتادى. ونىسى دۇرىس. ول ەۋرازيالىق ەكونوميكالىق وداقتىڭ ءوز ەلىنە ءتيىمسىز ەكەنىن اراكىدىك ايتىپ وتىرادى.
ال قازاقستان ديپلوماتيالىق دەڭگەيدە بۇل رەتتە ءلام-ميم دەپ ءتىس جارعان ەمەس.
ەرتە بولسىن، كەش بولسىن، بۇل تۇرىمەن ەۋرازيالىق ەكونوميكالىق وداق كۇيرەپ تىنادى. تاريحتا ول تيىمسىزدىك تانىتقان، وزىنە مۇشە ەلدەرگە وتە كوپ ماسەلە تۋدىرعان قۇرىلىم رەتىندە قالادى"، – دەيدى ول.
ساياساتتانۋشىنىڭ ايتۋىنشا، قازاقستان ءۇشىن ءقازىر ەڭ ءتيىمسىزى — رەسەيمەن اراداعى وداق.
"مۇمكىن، ورتا ازيالىق بلوك قۇرۋ تۋرالى باستامانى كوتەرىپ جىبەرسەك، جاقسى بولار ما ەدى؟..
وزبەكستان پرەزيدەنتى شاۆكات ميرزيەيەۆ ونسىز دا ەكى الاقانىن ىسقىلاپ مۇنى قالاپ وتىر. تەمىردى قىزعان كەزدە سوق دەمەكشى، ايماقتىق ەكونوميكالىق سول بلوكتى قۇرىپ جىبەرۋ كەرەك سەكىلدى.
نە ءۇشىن دەيسىزدەر مە؟ قىتايعا، رەسەيگە، ەۋروپالىق وداق پەن اقش-قا قاتىستى ءوز مۇددەمىزدى قورعاپ قالۋ ءۇشىن. ياعني، ويىمىزدى اشىق ايتاتىن كەز كەلدى. ول ءۇشىن وسىنداي الاڭقاي كەرەك بىزگە..."، – دەيدى ساتپايەۆ.
