Qazaqstanda bastaýysh synyp oqýshylary úshin bólim boiynsha jiyntyq baǵalaý men toqsandyq jiyntyq baǵalaýdy alyp tastaý máselesi áli talqylanyp jatyr. Eger bul usynys qoldaý tapsa, bastaýyshtaǵy oqýshylardyń bilimi formativti baǵalaý arqyly baǵalanýy múmkin. Bul týraly Oqý-aǵartý ministri Juldyz Súleimenova áleýmettik jelidegi videosynda aitty, dep habarlaidy dalanews.kz.
Ministrdiń sózinshe, bul ózgeris oqýshylardyń bilimin baǵalaýdan tolyq bas tartý degendi bildirmeidi. Mektepterde kúndelikti formativti baǵalaý saqtalady. Iaǵni muǵalimder oqýshynyń oqý materialyn qalai meńgerip jatqanyn, sabaqtaǵy belsendiligin, mátindi túsinýin jáne jalpy úlgerimin baqylap, der kezinde keri bailanys berip otyrady.
Al bólim sońynda jáne toqsan aiaqtalǵanda ótkiziletin BJB men TJB-nyń bastaýysh synyp oqýshylary úshin qanshalyqty qajet ári tiimdi ekeni qaita qaralmaq.
Juldyz Súleimenovanyń aitýynsha, bastaýysh mekteptegi negizgi maqsat – balany baǵa arqyly qysymǵa túsirý emes, onyń mektepke, oqýǵa jáne jańa ortaǵa beiimdelýine jaǵdai jasaý. Ministr bastaýysh kezeń balanyń bilimge qyzyǵýshylyǵy qalyptasatyn mańyzdy ýaqyt ekenin atap ótti.
«Bastaýysh mektep – balanyń mektep ómirine beiimdelip, bilim alýǵa jáne qurdastarymen qarym-qatynas ornatýǵa úirenetin eń mańyzdy kezeń. Sondyqtan búginde bastaýysh synyptardaǵy barlyq pán boiynsha BJB men TJB-ny alyp tastaý máselesin jan-jaqty talqylap jatyrmyz», – dedi ministr.
Onyń aitýynsha, álemniń kóptegen elinde bastaýysh synyp oqýshylary Qazaqstandaǵydai jiyntyq baǵalaý júiesimen oqymaidy. Al elimizde balalar 2-synyptan bastap BJB jáne TJB tapsyrady.
Ministr bul bastamanyń taǵy bir mańyzdy jaǵy muǵalimderdiń júktemesin azaitý ekenin aitty. Qazir bastaýysh synyp pedagogteri ár pán boiynsha BJB men TJB tapsyrmalaryn daiyndap, keiin olardy tekserýge kóp ýaqyt jumsaidy.
Juldyz Súleimenova bul ýaqytty balalarmen jeke jumys isteýge, bilimdegi olqylyqtardy tolyqtyrýǵa jáne oqýshylardyń qabiletin damytýǵa baǵyttaýǵa bolatynyn jetkizdi.
«Qazir bastaýysh synyp muǵalimderi barlyq pán boiynsha BJB men TJB tapsyrmalaryn ázirlep, keiin olardyń barlyǵyn tekserýge kóp ýaqyt jumsaidy. Myńdaǵan jumysty tekserý pedagogterge aitarlyqtai salmaq túsiredi. Sol ýaqytty balalarmen jeke jumys isteýge, olardyń bilimindegi olqylyqtardyń ornyn toltyrýǵa jáne qabiletterin damytýǵa jumsaýǵa bolar edi. Sondyqtan bul máseleni jan-jaqty zerdelep jatyrmyz», – dedi ministr.
Ázirge bul bastama boiynsha naqty sheshim qabyldanǵan joq. Ministrdiń aitýynsha, másele tamyz aiynda ótetin dástúrli pedagogterdiń tamyz keńesinde keńinen talqylanady.
Juldyz Súleimenova muǵalimderdi, sarapshylardy jáne ata-analardy osy usynysqa qatysty pikir bildirýge shaqyrdy. Onyń sózinshe, barlyq usynys bilim berý júiesin jetildirýge baǵyttalǵan túpkilikti sheshim qabyldaý kezinde eskeriledi.
