Basqa eldiń qarýly qaqtyǵysyna qatysqan qazaqstandyqtar qylmystyq jaýapkershilikke tartylady, dep habarlaidy Dalanews.kz.
“Keiingi ýaqytta áleýmettik jelilerde azamattar arasynda basqa memleketterdiń Qarýly Kúshterimen kelisimshart jasasyp, qarjylai syiaqy alý týraly jarnamalyq materialdar men beinemazmundar taralyp jatyr. Qazaqstan Respýblikasy Qylmystyq kodeksi boiynsha qarýly qaqtyǵystarǵa qatysqany úshin qylmystyq jaýapkershilik kózdelgen”, — dep habarlady Qazaqstan Respýblikasy Ishki ister ministrliginiń baspasóz qyzmeti.
Osylaisha, eger Qazaqstan Respýblikasynyń azamaty qarýly qaqtyǵystarǵa nemese áskeri áreketterge basqa memleketterdiń aýmaǵynda zańsyz qatyssa jáne jaldamashy áreketteri baiqalmasa (QR Qylmystyq kodeksiniń 172-baby), oǵan bes jyldan toǵyz jylǵa deiin bas bostandyǵynan aiyrý jazasy qarastyrylǵan. Al jaldamashy bolǵan azamattar (QR Qylmystyq kodeksiniń 170-baby) jeti jylǵa deiin nemese ómir boiy bas bostandyǵynan aiyrý, Qazaqstan Respýblikasynyń azamattyǵynan aiyrý, sondai-aq múlikti tárkileý jazasy taǵaiyndalady.
“Ishki ister ministrligi azamattarǵa Qazaqstan Respýblikasynyń zańnamasyn saqtaýdy jáne quqyqtyq aýyr saldarǵa ákep soǵýy múmkin áreketterden aýlaq bolýdy qatań usynady”, — dep tolyqtyrdy vedomstvo.
Eske salaiyq, belgili saiasattanýshy Aidos Sarym sheteldegi soǵystarǵa qatysyp júrgen qazaqstandyqtar týraly pikir bildirgen edi. Onyń aitýynsha, buǵan deiin Siriiaǵa 500-ge jýyq adam ketken, al qazir Ýkrainadaǵy soǵysqa qatysyp júrgender de az emes.
“Qaitarylǵandary qaitaryldy, otbasymen birge ketkenderi de bar. Biraq bizdiń Ulttyq qaýipsizdik komitetiniń múmkindigi shekteýli. Onyń quramynda bar-joǵy 2-3 myń adam ǵana. Eger olar eldegi qaýipsizdikti qamtamasyz etip, ekstremizm men terrorizmniń jolyn bógei alsa, sonyń ózi jetkilikti”, – dedi Sarym.
Ol soǵysqa ketken azamattar óz tańdaýyn jasaǵanyn jáne bul jaǵdai basqalarǵa sabaq bolýy keregin atap ótti.
“Men ózim 2-3 naqty jaǵdaimen ainalysyp jatyrmyn. Birneshe adam qabyldaýyma kelip, “balalarymyz Resei túrmesinde otyr” dep shaǵymdandy. Biz bul máseleni sheshý úshin elshilikpen jumys istep jatyrmyz. “Sol azamatty elge qaitaryńyzshy, biz ózimiz-aq sottap, jazasyn beremiz” degen áńgimeni biz de aityp jatyrmyz. Sondyqtan, meili olar Ýkraina jaǵynda bolsyn, Resei jaǵynda bolsyn – báribir. Olar óz tańdaýyn jasaǵanda, elge qaitpaitynyn bilip ketti. Endi zań aldynda jaýap berýi kerek”, – dedi saiasattanýshy.
Aita keteiik, buǵan deiin "Ómir súrgim keledi" jobasy Resei áskeriniń qatarynda Ýkrainadaǵy soǵysqa qatysyp júrgen qazaqstandyqtardyń tizimin jariialaǵan edi. Joba málimetinshe, soǵysqa 600-den astam qazaqstandyq attanǵan. Tizimde 264 adamnyń aty-jóni kórsetilgen, olardyń arasynda qazaq azamattary da bar.
