Áleýmettik jelide Astana qalasynyń jáne respýblikalyq “Áziret Sultan” meshitiniń bas imamy Erbolat Júsipovke qatysty video jappai tarady. Onda belgisiz bireý elordadaǵy “záýlim saraidai" úi bas imamǵa tiesili ekenin aitady. Alaida úidiń shyn iesi bul aqparatty joq shyǵardy, dep habarlaidy Dalanews.kz.
Video avtory záýlim úidi bastapqyda meshit dep oilap qalǵanyn jetkizedi.
“Men alǵashynda muny meshit dep qaldym. Sóitsem, bul Astananyń bas imamynyń úii eken. Meshit siiaqty dáý ǵoi, sumdyq! Al endi sadaqalaryńdy jiberińder! Ár juma saiyn salǵan sadaqalaryń qaida ketip jatyr? Qaltaǵa ketip jatyr. Ne degen sarai mynaý!?” – deidi video avtory.
Jelide tez taraǵan bul aqparat qoǵamda úlken daý týǵyzdy. Alaida kóp uzamai Astana turǵyny Nurlan Lesbekuly videoǵa shyqqan úidiń ózine tiesili ekenin málimdedi.
“Áleýmettik jelilerde bul úi bas imamǵa tiesili degen aqparat tarady. Bul – jalǵan. Bul meniń jeke menshigim. 15 jyldan beri osy úide turyp kelemin”, – dedi ol QMDB resmi ókili Aǵabek Qonarbaiuly jariialaǵan videoda.
Osy jaǵdaiǵa bailanysty Erbolat Júsipov jelidegi jalǵan aqparatqa núkte qoiý qajet ekenin aitty.
“Qadirmendi aǵaiyn, sońǵy ýaqytta áleýmettik jelide jalǵan aqparat kóbeiip ketti. Imamdar men ustazdarǵa jala jabý beleń alyp barady. Qasietti Quranda aitylǵandai, bireýdiń aqysyn jeý, jala jabý, ádiletsizdik jasaý – aýyr kúná ári aqyrettegi aýyr azapqa sebep bolatyn is”, – dedi ol.
Imam kópshilikti jalǵan aqparatqa senbeýge jáne kez kelgen málimetti tekserip baryp qabyldaýǵa shaqyrdy.
