Bas prokýratýra Qytai investorynyń quqyqtaryn qorǵap shyqty. Qabyldanǵan sharalardyń arqasynda quny 7 mlrd teńge bolatyn joba buǵattan bosatyldy, dep habarlaidy Dalanews.kz.
Vedomstvonyń baspasóz qyzmetiniń habarlaýynsha, "Qorǵas" HShQO arnaiy ekonomikalyq aimaǵynyń aýmaǵynda "Qolónershiler qalasy" saýda pavilonyn salý boiynsha investitsiialyq jobany iske asyratyn qytailyq investor - "International castle" JShS-nyń máselesi sátti sheshildi.
"Kompaniia arnaiy ekonomikalyq aimaq qatysýshylarynyń tizilimine tirkeýden bas tartý túrinde jáne qatysý shartynyń qoldanylý merziminiń aiaqtalýyna bailanysty jobany iske asyrýda belgili bir kedergilerge tap boldy. Qurylys materialdaryn jetkizýdiń aiaqtalmaǵan kedendik rásimine jáne investordy keiinnen tizilimnen shyǵarýǵa bailanysty Memlekettik kiris organdary 1,4 mlrd teńgege kedendik tólemderdi qosymsha eseptegen", delingen habarlamada.
Investorǵa qatysty shekteýler alynyp tastaldy, zańsyz eseptelgen tólemderdiń kózi joiyldy. Jiberilgen buzýshylyqtar úshin kináli laýazymdy tulǵa tártiptik jaýapkershilikke tartyldy. Nátijesinde kompaniia 7 mlrd teńge turatyn jobany qaita iske qosty, onyń sheńberinde jańa jumys oryndary qurylatyn bolady.
Investitsiialyq joba týristik jáne saýda áleýetin damytýǵa, sondai-aq arnaiy ekonomikalyq aýmaqta qazaqstandyq tarapqa qytailyq týristerdiń qyzyǵýshylyǵyn arttyrýǵa baǵyttalǵan.
"Eger siz investor bolsańyz jáne jobany júzege asyrýda qiyndyqtar týyndap jatsa, quqyqtyq kómek alý jáne keńes alý úshin Bas prokýratýranyń kásipkerler men investorlar quqyqtaryn qorǵaý jónindegi call-ortalyǵyna habarlasýǵa bolady: 7172 30-17-93, +7-702-629-75-61", - dep habarlaidy vedomstvodan.
Buǵan deiin 2025 jylǵy qańtar–shilde ailarynda negizgi kapitalǵa salynǵan investitsiialar ósimi (NKI) ótken jyldyń osyndai kezeńindegi 19,3% kórsetkishpen salystyrǵanda 16,1%-ǵa deiin baiaýlaǵanyn jazǵanbyz.
