باس پروكۋراتۋرا جۇڭگو ينۆەستورىنىڭ قۇقىقتارىن قورعاپ شىقتى. قابىلدانعان شارالاردىڭ ارقاسىندا قۇنى 7 ملرد تەڭگە بولاتىن جوبا بۇعاتتان بوساتىلدى، دەپ حابارلايدى Dalanews.kz.
ۆەدومستۆونىڭ باسپا ءسوز قىزمەتىنىڭ حابارلاۋىنشا، "قورعاس" حشقو ارنايى ەكونوميكالىق ايماعىنىڭ اۋماعىندا "قولونەرشىلەر قالاسى" ساۋدا پاۆيلونىن سالۋ بويىنشا ينۆەستيسيالىق جوبانى ىسكە اسىراتىن قىتايلىق ينۆەستور - "International castle" جشس-نىڭ ماسەلەسى ءساتتى شەشىلدى.
"كومپانيا ارنايى ەكونوميكالىق ايماق قاتىسۋشىلارىنىڭ تىزىلىمىنە تىركەۋدەن باس تارتۋ تۇرىندە جانە قاتىسۋ شارتىنىڭ قولدانىلۋ مەرزىمىنىڭ اياقتالۋىنا بايلانىستى جوبانى ىسكە اسىرۋدا بەلگىلى ءبىر كەدەرگىلەرگە تاپ بولدى. قۇرىلىس ماتەريالدارىن جەتكىزۋدىڭ اياقتالماعان كەدەندىك راسىمىنە جانە ينۆەستوردى كەيىننەن تىزىلىمنەن شىعارۋعا بايلانىستى مەملەكەتتىك كىرىس ورگاندارى 1،4 ملرد تەڭگەگە كەدەندىك تولەمدەردى قوسىمشا ەسەپتەگەن"، دەلىنگەن حابارلامادا.
ينۆەستورعا قاتىستى شەكتەۋلەر الىنىپ تاستالدى، زاڭسىز ەسەپتەلگەن تولەمدەردىڭ كوزى جويىلدى. جىبەرىلگەن بۇزۋشىلىقتار ءۇشىن كىنالى لاۋازىمدى تۇلعا تارتىپتىك جاۋاپكەرشىلىككە تارتىلدى. ناتيجەسىندە كومپانيا 7 ملرد تەڭگە تۇراتىن جوبانى قايتا ىسكە قوستى، ونىڭ شەڭبەرىندە جاڭا جۇمىس ورىندارى قۇرىلاتىن بولادى.
ينۆەستيسيالىق جوبا تۋريستىك جانە ساۋدا الەۋەتىن دامىتۋعا، سونداي-اق ارنايى ەكونوميكالىق اۋماقتا قازاقستاندىق تاراپقا قىتايلىق تۋريستەردىڭ قىزىعۋشىلىعىن ارتتىرۋعا باعىتتالعان.
"ەگەر ءسىز ينۆەستور بولساڭىز جانە جوبانى جۇزەگە اسىرۋدا قيىندىقتار تۋىنداپ جاتسا، قۇقىقتىق كومەك الۋ جانە كەڭەس الۋ ءۇشىن باس پروكۋراتۋرانىڭ كاسىپكەرلەر مەن ينۆەستورلار قۇقىقتارىن قورعاۋ جونىندەگى call-ورتالىعىنا حابارلاسۋعا بولادى: 7172 30-17-93، +7-702-629-75-61"، - دەپ حابارلايدى ۆەدومستۆودان.
بۇعان دەيىن 2025 جىلعى قاڭتار–شىلدە ايلارىندا نەگىزگى كاپيتالعا سالىنعان ينۆەستيسيالار ءوسىمى (نكي) وتكەن جىلدىڭ وسىنداي كەزەڭىندەگى 19،3% كورسەتكىشپەن سالىستىرعاندا 16،1%-عا دەيىن باياۋلاعانىن جازعانبىز.
