Bas prokýratýranyń jaýabyn 8 aqpanda "Ar.Rýh.Haq" qoǵamdyq qorynyń jetekshisi Baqytjan Tóreǵojina Facebook paraqshasynda jariialady.
Bas prokýratýra jaýabynda 15 qańtarda Ortalyq kommýnikatsiia qyzmetiniń brifingisinde qańtar oqiǵasy kezinde 225 adamnyń qaza bolǵany (keiin eki adamnyń aýrýhanada kóz jumǵany anyqtalyp, qaza bolǵandar 227 boldy – red.) habarlanǵanyn atap ótken.
"Qaza bolǵandar jaily qalǵan aqparat Qylmystyq-protsestik kodekstiń 201-babyna sáikes, qazirgi kezde jariialanýǵa jatpaidy" delingen jaýapta.
Quqyq qorǵaýshy Baqytjan Tóreǵojina jetekshilik etetin Qantar2022 eriktiler toby buǵan deiin qaza bolǵandardyń tizimin óz betinshe anyqtap, jariialaǵan edi. Onda 173 adamnyń aty-jóni kórsetilgen. Azattyq ta buǵan deiin qaza bolǵandardyń aty-jónin jariialaǵan.
Kóptegen belsendi men quqyq qorǵaýshy bilikti Qańtar qurbandarynyń tizimin jariialaýǵa shaqyryp keledi. Ázirge bul biliktiń bergen "jalǵyz" jaýaby.
Almaty qalalyq politsiia departamentiniń bastyǵy Qanat Taimerdenov 16 qańtar kúngi brifing kezinde Almatyda "149 azamat opat boldy, quqyq qorǵaý organdary arasynda 11 adam qaza boldy" dep málimdegen.
Quqyq qorǵaýshylar qurbandar budan da kóp bolýy múmkin dep boljaidy.
Resmi málimet boiynsha, qańtar oqiǵasy kezinde 227 adam qaza bolǵan. Quqyq qorǵaýshylar men belsendilerdiń aitýynsha, oqiǵa kezinde óte kóp beibit azamat oqqa ushqan.
Halyqaralyq jáne jergilikti quqyq qorǵaýshylar Nur-Sultandy qańtar qyrǵynyn táýelsiz jáne jan-jaqty zertteýge shaqyrǵan. Áli kúnge deiin oqiǵaǵa qatysty keibir negizgi suraqtarǵa jaýap berilgen joq.
