باس پروكۋراتۋرا قاڭتار وقيعاسىندا قازا بولعان ازاماتتاردىڭ ءاتى-جونىن جاريالاۋدى سۇراعان قۇقىق قورعاۋشىعا تەرگەۋ قۇپيالىلىعىن العا تارتىپ، ءتىزىم جاريالانبايتىنىن مالىمدەدى.

باس پروكۋراتۋرانىڭ جاۋابىن 8 اقپاندا "ار.رۋح.حاق" قوعامدىق قورىنىڭ جەتەكشىسى باقىتجان تورەعوجينا Facebook پاراقشاسىندا جاريالادى.

باس پروكۋراتۋرا جاۋابىندا 15 قاڭتاردا ورتالىق كوممۋنيكاسيا قىزمەتىنىڭ بريفينگىسىندە قاڭتار وقيعاسى كەزىندە 225 ادامنىڭ قازا بولعانى (كەيىن ەكى ادامنىڭ اۋرۋحانادا كوز جۇمعانى انىقتالىپ، قازا بولعاندار 227 بولدى – رەد.) حابارلانعانىن اتاپ وتكەن.

"قازا بولعاندار جايلى قالعان اقپارات قىلمىستىق-پروسەستىك كودەكستىڭ 201-بابىنا سايكەس، قازىرگى كەزدە جاريالانۋعا جاتپايدى" دەلىنگەن جاۋاپتا.

قۇقىق قورعاۋشى باقىتجان تورەعوجينا جەتەكشىلىك ەتەتىن Qantar2022 ەرىكتىلەر توبى بۇعان دەيىن قازا بولعانداردىڭ ءتىزىمىن ءوز بەتىنشە انىقتاپ، جاريالاعان ەدى. وندا 173 ادامنىڭ ءاتى-جونى كورسەتىلگەن. ازاتتىق تا بۇعان دەيىن قازا بولعانداردىڭ ءاتى-جونىن جاريالاعان.

كوپتەگەن بەلسەندى مەن قۇقىق قورعاۋشى بيلىكتى قاڭتار قۇرباندارىنىڭ ءتىزىمىن جاريالاۋعا شاقىرىپ كەلەدى. ازىرگە بۇل بيلىكتىڭ بەرگەن "جالعىز" جاۋابى.

الماتى قالالىق پوليسيا دەپارتامەنتىنىڭ باستىعى قانات تايمەردەنوۆ 16 قاڭتار كۇنگى بريفينگ كەزىندە الماتىدا "149 ازامات وپات بولدى، قۇقىق قورعاۋ ورگاندارى اراسىندا 11 ادام قازا بولدى" دەپ مالىمدەگەن.

قۇقىق قورعاۋشىلار قۇرباندار بۇدان دا كوپ بولۋى مۇمكىن دەپ بولجايدى.

رەسمي مالىمەت بويىنشا، قاڭتار وقيعاسى كەزىندە 227 ادام قازا بولعان. قۇقىق قورعاۋشىلار مەن بەلسەندىلەردىڭ ايتۋىنشا، وقيعا كەزىندە وتە كوپ بەيبىت ازامات وققا ۇشقان.

حالىقارالىق جانە جەرگىلىكتى قۇقىق قورعاۋشىلار نۇر-سۇلتاندى قاڭتار قىرعىنىن تاۋەلسىز جانە جان-جاقتى زەرتتەۋگە شاقىرعان. ءالى كۇنگە دەيىن وقيعاعا قاتىستى كەيبىر نەگىزگى سۇراقتارعا جاۋاپ بەرىلگەن جوق.