Bas prokýratýra men Qarjylyq monitoring ókilderi Murat Boranbaevty izdeý jumystary týraly aitty. Murat Boranbaev eki jyldan beri tabylmai jatyr, - dep habarlaidy Dalanews.kz Tengrinews.kz-ke silteme jasap.
Aita keteiik, tanymal kásipker Qairat Boranbaevtyń inisi Murat Boranbaev Almatydaǵy "A-parking" aqyly turaqtary boiynsha iste kúdikti retinde tanylǵan. Tergeý bastalǵan jyly Boranbaevqa izdeý jariialandy.
Bas prokýratýranyń málimetinshe, is áli tergeýde.
"Qylmystyq kodekstiń 189-baby 2 - tarmaǵynyń 4-bóligi boiynsha qylmystyq is Almaty qalasy Ekonomikalyq tergeý departamentiniń óndirisinde jatyr, ol boiynsha 19.01.2023 jyly kúdiktini izdestirýge bailanysty sotqa deiingi is júrgizý merzimin toqtata turý týraly sheshim qabyldandy", - dep habarlady Bas prokýratýra ókilderi.
Al Qarjylyq monitoring agenttigindegiler Murat Boranbaevqa halyqaralyq izdeý jariialanǵanyn rastady.
"Ekonomikalyq tergeý qyzmetiniń óndirisinde memlekettik qarajatty asa iri mólsherde urlaý faktisi boiynsha sotqa deiingi tergeý júrip jatyr jáne Murat Boranbaevqa halyqaralyq izdeý jariialandy. QR Qylmystyq is júrgizý kodeksiniń 201-babyna sáikes sotqa deiingi tergep-tekserý derekteri jariia etilmeidi. Olar eger bul tergeý múddelerine qaishy kelmese jáne basqa adamdardyń quqyqtary men zańdy múddelerin buzýmen bailanysty bolmasa, prokýrordyń ruqsatymen qajet dep tanylatyn kólemde ǵana jariia etilýi múmkin", - dep habarlady QMA ókilderi.
Eske salaiyq, kásipker Murat Boranbaevqa 2022 jyldyń shildesinde izdeý jariialanǵan bolatyn. 54 jastaǵy Boranbaev Almatydaǵy aqyly turaqtarǵa qatysty aqsha jymqyrý isinde "eń basty kúdikti" dep tanylǵan.
Murat Boranbaev kásipker Qairat Boranbaevtyń inisi.
Almatyda aqyly turaqtar 2016 jyly iske qosyldy. Al 2022 jyldyń sáýirinde aqyly turaqtar Almatynyń kommýnaldyq menshigine berildi.
