Senat kýlýarynda Bas prokýrordyń orynbasary Ǵalymjan Qoigeldiev Qytai túrmesinde jazasyn ótep jatqan Aqjarqyn Turlybaiǵa qatysty pikir bildirdi, dep habarlaidy Dalanews.kz.
Birneshe jyl buryn Aqjarqyn Turlybaidy elge qaitarý úshin prokýratýra men Syrtqy ister ministrligi belsendi jumys bastaǵan bolatyn. Biraq qazir bul máselege qatysty aqparat azaiyp, qoǵamda túrli alyp-qashpa áńgimeler paida boldy. Áleýmettik jelilerde Aqjarqynnyń Qazaqstanǵa oralǵany týraly jáne ony qupiia túrde qaitarǵany jaily málimetter tarap jatyr. Osyǵan orai BAQ ókilderi Aqjarqyn Turlybaidyń qazirgi jaǵdaiy men ony elge qaitarý jospary týraly surady.
Ǵalymjan Qoigeldievtiń aitýynsha, Qazaqstannyń Qytaidaǵy azamatyn elge qaitarý úshin prokýratýra men SIM birlesip jumys júrgizýde.
“Bul isti toqtatqan joqpyz, belsendi jalǵastyrýdamyz. Jaqyn arada oń sheshimin tabady dep úmittenemin”, – dedi ol.
Sondai-aq Aqjarqyn Turlybai jazasyn Qazaqstanda ótegisi keletinin aityp, resmi ótinish jasaǵan. Qoigeldievtiń sózinshe, Aqjarqynnyń advokaty turaqty túrde bailanys ornatyp otyr.
“Óz jazasyn elde ótegisi keletini jaily aryzy bizge kelip túsken. Ol elge kelip ótegisi keledi. Advokaty bizben turaqty túrde bailanysta”, - dedi ol.
Aita keteiik, Aqjarqyn Turlybai 2014 jyly Almatydan Qytaiǵa barǵan bolatyn. Onyń sózinshe, tanys adamdary Gýanchjoýdan Malaiziiaǵa brend kiimderdi jetkizip, aqsha tabýdy usynǵan. Qazaqstandyq stýdent Gýanchjoýdan ushar aldynda ustaldy. Onyń sómkesinen esirtki tabylǵan bolatyn.
